Qivittuissuit akornanniinnikuunngikkuit taava tusarnaagassaqarputit

Katrine Rasmussen Kielsenip atuakkiaa “Qivittuissuit akornanniinnikuuvunga” siorna maajimi saqqummerpoq.

Atuagaq 7.500-nitt amerlanerusunngorlugu manna tunineqareerpoq. Danmarkimilu atuakkanik atuarlugu immiussanik saqqummersitsivimmi tunisaanerpaatut sapaatit akunnerini kingullerni marlunni inissisimavoq. Atuakkiortup tamanna tupaallaatigaa.

- Tunisaanissaanut soorunami neriuuteqarpugut, kisianni taamarsuaq tunitigissallugu naatsorsuutiginngikkaluarpara. Kisianni aamma kalaallit qivittunik nuannarisaqartut nalunngereerpakka, atuakkiortoq Katrine Rasmussen Kielsen KNR-imut oqarpoq.

Nunarsuarmi nunani assigiinngitsuni piumaneqartoq

Atuagaq kalaallit Tysklandimiittunit, Islandimiittunit, Savalimmiuniittunit nunanilu allaniittunit inniminnerneqarluarsimasoq atuakkiortoq oqarpoq.

Atuakkani nunatsinni saqqummersinneqartuni aatsaat taama sukkatigisumik tunisaqartoqartoq, Kalallit Nunaanni atuakkiortut peqatigiiffiata oqaatigaa.

- Atuagaq kalaallisuujulluni Danmarkimi taama pisiarineqartigisimammat, taannartaa tupaallannartorujussuuvoq. Atuakkat allat kalaallisuut Danmarkimi saqqummersinneqarnikut taama pisiarineqartiginikuunngillat, Kalaallit Nunaanni atuakkiortut peqatigiiffianni siulittaasoq, Juaaka Lyberth oqarpoq.

Paamiuneersup 42-nik ukiullip Katrine Rasmussen Kielsenip Qivittuissuit akornanniinnikuuvunga piviusulersaarusiatut atuakkiaraa.

Taanna atuakkiaminik pingajussaaneerluni saqqummersitsivoq. Atuakkiai allat tassaapput: Matup kasuttornera aamma  Ersinartulersaaqatigisigut.

Atuakkamik aatsaat taama tunisisoqartigeqqittoq

Qivittut, inuillisimasut, aliortukkallu atuassallugit radiukkullu tusarnaasallugit soqutigineqarnerujussuat uppernarsineqartoq, Juaaka Lyberth isumaqarpoq:

- Nunatsinni atuakkat saqqummersinneqartut 500-miit 1000-inut, tunineqarluaraangatalu 2000-it sinnilaarlugit pisiarineqartarput.

- Kisianni Katrinap atuakkiaa nuannarineqartorujussuullunilu pilerigineqartorujussuuvoq, Juaaka Lyberth oqarpoq.

Atuagaq “Qivittuissuit akornanniinnikuuvunga” maanna qallunaatut nutserneqaleruttorpoq, aappaagulu saqqummersinneqarnissaa naatsorsuuutigineqartoq, Kalaallit Nunaanni atuakkiortut kattuffiat ilisimatitsivoq, imalu nangilluni:

- Katrine Rasmussen Kielsenip torrallaarujussuarneranut Kalaallit Atuakkiortut pilluaqquaat, tulluusimaarutigalugulu, kalaallinullu atuartartunut ukiaru ilisaritinneqarnissaa qilanaarilereerlugu.

Atuakkap aamma tuluttut nutserneqarnissaa pilersaarutaavoq.