Maki Seaweed Greenland tunisassiorunnaarpoq
Maki Seaweed Greenland nunatsinni immap naasuinik kisiartaalluni tunisassiorfiugaluarpoq. Tunisassiornerullu unitsinneqarnera piginnittup uggoraa.
- Unitsitsineq uggornaraluaqaaq, - taamaakkaluartoq immap naasuinut tunngasunik ilisimalikkat maangaannartikkumanagit Maki Seaweed Greenlandip siunnersuisutut attartorneqarsinnaanera ammatippara, Maki Seaweed Greenlandimi piginnittoq Ulrik Maki Lyberth tusagassiuutinut nalunaarummi taama allaaserisaqarpoq, nangillunilu:
- Illumik attartukkamik isumaqatigiissutip atorunnaarnera iluatsillugu taamatullu piorsaaniarnermi pisortaqarfinniit aporfissalersuinerujussuaq tunisassiorunnaarnermi peqqutaaqataalluinnarput.
Sullivinnik aallarnisaanissamik suliniuteqartut Startup Greenlandimik taallugu Sisimiuni 2014-imi aaqqissuunneqarmat Maki Seaweed Greenlandip niuernermut pilersaarusiaa ajugaavoq. Tunisassiaalu ilaatigut Brugsenimi Pisiffimmilu pisiarineqarsinnaallutik.