Halibut Greenland Greenland Venturelu suleqatigiikkunnaarput
Greenland Venturep Halibut Greenlandillu ukiuni arfineq-pingasuni piginneqatigiissimanertik Ilulissani ippassaq naggaserpaat. Pilersitseqataasummi Greenland Venturep piginneqataassutaat pisiaraat, suliffeqarfiup ineriartorteqqinnissaanut suli periarfissaqarlutik. Halibut Greenland Greenland Venturelu tusagassiuutinut taama nalunaaruteqarput, Greenland Venturellu aningaasaliissutini erniorluartissimavai.
Tunisinermi aki ukiunilu kingulerni agguagarsiat katikkaanni Greenland Venturep aningaasaliissutini minnerpaamik 20-riarluni utertissamagai tusagassiuutini nalunaarummi ilaatigut allassimavoq.
Halibut Greenland siorna 200 millionit koruuninik kaaviiaartitsivoq, akileraarutillu peereerlugit 30 millionit koruuninik sinneqartooruteqarluni.
- Angalaqatigiinnerput tamaanga killeqarpoq, taassumalu takutippaa suliffeqarfimmik namminersortumik aningaasatigullu ingerlalluartumik pilersitsisoqarsinnaanera, Halibut Greenlandip siulersuisut siulittaasuat Johan Villadsen, Greenland Venturellu pisortaa Karsten Høy, tusagassiuutinut nalunaarummi ataatsimut ilaatigut allaaserisaqarput.
