Islandimi tusagassiortunik katersortitsineq: Issittormiut Issittoq pillugit oqaluuserinnittuunngillat
Naalakkersuisut siulittaasuat, Jens-Frederik Nielsen Islandimiut ministeriunerat Kristrún Frostadóttir, aamma Savalimmiut Lagmandiat, Beinir Johannesen Atlantikup avannaani suleqatigiinnerunissamik oqalliseqatigiartorlugit Islandimut ullumi tikippoq.
Ullorlu naalersoq tusagassiortunik katersortitsipput.
- Ataatsimut ilungersuuterpassuupput, ilungersuutinili aamma periarfissaqarpoq, Islandimiu, Kristrún Frostadóttir tusagassiortunik katersortitsinerup aallartinnerani oqarpoq.
Taamaammat naalakkersuisuni siuttut pingasut siunissami ataatsimiittalerniarput. Tamanna ukiumoortumik ingerlattalerniarpaat, taanna oqarpoq.
Naalakkersuisut siulittaasui marluk oqaatsimut tassunga tapersiillutik anngaapput, Savalimmiullu lagmandiat Beinir Johannesen ilassuteqarluni.
- Inuit Issittumi najugaqartut Issittoq pillugu oqaluuserinnittuunnginnerugajupput, taanna oqarpoq.
Suleqatigiinneq nutaajunngitsoq
Nunalli taakku pingasut suleqatigiinnerat nutaajunngilaq.
- Nunagut sivisuumik suleqatigiipput, kisianni aatsaat naalakkersuisut tungaanniittut suleqatigiittoqarpoq, Jens-Frederik Nielsen oqarpoq.
Taassumalu nunatta Islandimit Savalimmiuniillu USA-mut isumaqatiginninniarnermut atatillugu piffissami kingullermi tapersersuineq qujassuteqarfigaa.
Issittumilu isumannaallisaanermut isumaqatigiissut nutaaq apeqquteqartoqarsinnaalernerani siullertut apeqqutigineqarpoq. Naalakkersuisullu siulittaasuata uani uteqqippaa:
- Isumaqatigiissut kalaallinut pisussaaffiliillunilu ataqqinniffiusoq uagutsinnut aamma Europamut pitsaasuuvoq, aamma Issittumi sillimaniarnerunissamut ataatsimut anguniakkatsinnik naammassinniffiuvoq, taanna oqarpoq.
Jens-Frederik Nielsen Islandimut pisortatigoortumik aatsaat siullermeertumik tikeraarpoq. Taassuma Keflavik Air Base tikeraarnermini ilaatigut alakkassavaa.
