Qaqortumi innuttaasut: Imigassap inerteqqutaalernera meeqqanut pitsaasuuvoq suliffeqarfinnulli ajoqutaalluni
Imigassartortoqarsinnaajunnaarpat illoqarfimmut kommunimullu qanoq sunniuteqassua?
KNR-ip Qaqortumi innuttaasut imigassarsisinnaajunnaarnermut nioqquteqarsinnaajunnaarnermullu tallimanngormat atuutilersumut qanoq isumaqarfiginninnerannut tunngatillugu aqqusinermi apersorpaat.
Arlallit aalajangiineq, meeqqat eqqarsaatigalugit, nuannaarutigaat.
- Uanga iluareqaara, meeqqat toqqissineruniassammata, Malena KNR-imut oqarpoq:
- Tamakkutorneq ajoraluarpunga, quttateqaakka meerartallit meerartaat. Neriuppunga iluaqutigisinnaassagaat ilaatigut, kisianni ilaatigut ilimanassuseqanngilaq.
Mariap aamma Qaqortumeersup, imigassap inerteqqutigineqalernera, meeqqanut eqqissisimaarnerulersitsinissaa neriuutigaa.
- Pissangageqaara, meerannguit eqqissisimaalerniassapput. Neriuppunga meerannguit eqqissisimaalissasut. Nuannersumik inuunermik asanninnermik tuniorarneqarlutik.
Pisut sakkortuut qaangiummata eqqissisimaarnerulerneq
Kommune Kujallermi borgmesterip Malene Vahl Rasmussenip (D), angutip 37-nik ukiullip Nanortalimmi sapaatip akunnerata siuliani sisamanngornermi toqunneqarnera, imigassap inerteqqutaalerneranut pissutaasut ilagigaat nassuiaatigaa.
Qaqortumili innuttaasut pisup sakkortuup kommunimiit qisuariarfigineqarnerujussua aamma paasivaat.
- Pisariaqarsimammat matusimavaat pisartut pillugit. Taama tujorminartigisumik iliortoqarsimammat. Neriuppunga ammaqqissappata, imatorsuaq pilukattoqarpallaassanngittoq imaluunniit mianersorlutik imigassaq atortassagaat, Nanna oqarpoq.
Anthonip Qaqortumeersup aamma borgmesterip imigassamik inerteqquteqalernera pitsaasuunerarpaa:
- Imigassap matunera maani borgmesterip oqaaseqarneratut nuannersuuvoq taamatut matusigallarnera. Illoqarfimmi ajortuliortut uuminartarnermik.Neriuuteqarpunga sivisunerusumilluunniit matoqqatikkunikkit, taava illoqarfimmiunut toqqissisimanarnerussaaq.
Innuttaasulli ilaasa aalajangiineq, pitsaasunik kinguneqarsinnaangaluartoq, iluarivallaanngilaat
- Inuit eqqissisimapput meeqqat eqqissisimapput. Eqqissisimanaqaaq , Åge oqarpoq:
- Kisianni ingasagilaarpara.
Inuussutissarsiutilinnut ajoqutaasoq
Innuttaasut arlallit imigassap inerteqqutaalernera kujataani inuussutissarsiuteqartunut ajoqutaasoq aamma oqaatigaat.
- Ajorinngilara, aamma qujaruppara. Qujarukkallarpara. Kisianni naluara kingunissaa qanoq ikkumaarnersoq, Ole Qaqortumeersoq oqarpoq:
- Ajoqutigisinnaasaannik ukua pingaarnerutippakka namminersortut, taakkua iluanaarutissaraluatik annaavaat.
Jim Riis, Arctic Cafemik piginnittoq Hotel Qaqortumillu piginnittuusimasoq, Kommune Kujallermi kommunalbestyrelsimut, tamanut takuneqarsinnaasumik, allakkatigut isornartorsiuivoq.
- Suliffeqarfiit inatsisinik malittarisassanillu malinnittut, akileraartartut akileraartartunillu sulisullit, nassuiaatissartaqanngitsumik akuutitsinertaqanngitsumillu, ajortunngortinneqariataarput, Jim Riis, tallimanngormat unnukkut imigassap matuneqariataarnera pillugu, allappoq.
Pisut tunngavigalugit, Nanortalimmilu pisoqarnera tunngavigalugu, immikkut ittumik suliniuteqartoqartariaqarsimanera paasivaa.
Suliffeqarfiilli imigassamik nioqquteqarnernut tunngasut tamaasa aalajangiiffigineqarsimanerat paasisinnaanngilaa.
- Qanoq inissisimanerput paasineqanngilaq. Attuumassuteqartut siunnersuutaat tunngavilersuutaallu maluginiarneqanngillat oqaaseqarfigineqaratillu, Jim Riis, kommuni sapaatip akunnerata naanerata kingorna ataatsimeeqatigereerlugu taama allappoq.
Angajoqqaat, ”ajornartorsiuteqangaaramik meeqqaminnik sumiginnagaasut”, allattorsimasuutigineqartalernissaat suliffeqarfiillu imigassanik aalakoornartulinnik sassaalliuteqartartut, meeqqanik sammisassaqartitsinissamut pisussaaffilerneqarnissaat, allakkamini ilaatigut siunnersuutigaa.
- Kommuni kulturikkut suliniutissanik meeqqanullu sammisassaqartitsinernik, aningaasakilliorneq pissutigalugu, ukiorpassuarni isumaginnissinnaasimannginnera, kommunalbestyrelsimut ilaasortanut allakkami allaqqavoq.
