Kommune Kujallermi imigassamik nioqquteqarnermik matusineq pillugu oqallinneq: -Imigassaq pillugu politikki suliarineqarli
Partiit Kommune Kujallermi imigassamik nioqquternerup matuneqarnera pillugu KNR-imi toqqaannartumik aallakaatitassiaani Nunatsinni Pisumi ataasinngormat oqallipput. Imigassaq pillugu politikkiliornissaq partiit tamarmik ujartorpaat.
Allattoq Jonna Enoksen Dahl
oktobarip 07-at 2026 10:52
Imigassaq pillugu politikki suliarineqartariaqartoq partiiniit tamanit oqariartuutigineqarpoq.
-Immaqa oqarsinnaavugut sapaatip akunnera tulliani kingusinnerpaamik siulleq ataatsimiinneq pisimassasoq neriuutigaara, inatsisartunut ilaasortaq Aki-Mathilda Høegh-Dam (N) taama oqarpoq.
Inatsisartunut ilaasortaqatai Paarma Lund Kreutzmann (IA), Erik Jensen (S), Pipaluk Olsen (D) aamma Bentiaraq Ottosen (A) oqallinnermi aamma peqataapput.
Peqqissutsimut Naalakkersuisoq Anna Wangenheim (D) Kommune Kujallermilu borgmesteri Malene Vahl Rasmussen (D) aamma peqataapput.
Politikkissarli atuutilerpat ajornartorsiutit ingerlaannaq aaqqinnavianngitsut Naalakkersuisup Anna Wangenheimip oqaatigaa, partiilli suleqatiserai.
-Partiit qanorluunniit tunuliaqutaqaraluarutta naleqartitaqaraluaruttaluunniit tamatta pilliuteqartussaassaagut, annerusumik minnerusumilluunniit. Uani kinguaariit tullii qitiutillugit, uatsinniit pitsaanerungaartumik atugassaqartikkusullugit anguniagaqartariaqatta.
Unitsitsineq naammanngitsoq partiiniit eqqartorneqarpoq, tassanilu meeqqat toqqissisimanissaat qitiutinneqassasoq oqariartuutigineqarluni.
Imigassamik unitsitsineq kisimi aaqqiissutaanngilaq
Nunatsinni imigassamik matusineq takornartaanngilaq.
Kommuneqarfik Sermersuumi, Kommune Qeqertalimmi Kommune Kujallermilu 2022-mi sapaatip akunneri marluk sinnerlugit imigassamik nioqquteqarneq aamma matuneqarpoq.
Imigassamik nioqquteqarnermik matusinermik ammaaqqinneq ajornartorsiummik aaqqiineq ajortoq Erik Jensen isumaqarpoq.
Nunalli allat isumassarsiorfigineqarsinnaasut Erik Jensen isumaqarpoq.
-Islandi aamma nunasiaataanikuugami, qallunaat nunasiaatiginikuugamikku.Taassuma oqaluttuassartaanik aamma alakkaamasinnaaneq periarfissaavoq, imaanngikkaluarpoq ilaarniaratsigit.
Meeqqat eqqartorneqartillugit peqqissaasut isumaginninnermi ikiortillu aamma ukkatarineqartariaqartut Pipaluk Olsen isumaqarpoq.
-Nukittorsaasariaqarpugut uagut politikkikkut sinaakkutitsigut, meeqqeriveqarfimmi qanoruna suleriutsit ingerlanniartut. Taakkuupput meeqqat oqaasinnguisinnanngitsut timimikkulli atuisut qanimut sullissinerpaat.
Bentiaraq Ottosenip kommunit qanimut suleqatiginissai siunnersuutigaa.
- Kommunit tusarnaaqqissaarnissaat pingaaruteqarpoq, kommunimmi taakkuupput innuttaasut akornanni sullinneqarnermut kiffartuunneqarnermullu qanimut suliaqartuusut.
Oqallinneq tamakkiisoq KNR-ip nittartagaani isiginnaarneqarsinnaavoq.
