Unnuap qeqqanit atuutilissasoq: Kommunini pingasuni imigassamik inerteqquteqarneq
Naalakkersuisut coronamut akiuiniarnerminni killiliingaatsiarput.
Unnuap qeqqanit imigassamik tuniniaaneq nunatsinni kommunini pingasuni inerteqqutaalerpoq, tamannalu kommunimi ataatsimi februaarip aallaqqaataanut atuutissasoq sinnerini qulingiluaata tungaanut atuutissaaq.
Kommuneqarfik Sermersuumi Kommune Kujallermilu imigassamik inerteqquteqareq februaarip qulingiluaat ilanngullugu atuutissaaq, Qeqqata Kommunianilu tamanna februaarip aallaqqaataata tungaanut atuutissalluni.
Nunatsinni killilersuinerit - naatsumik
- Nunatsinni tamarmi tamanit iserfigineqarsinnaasuni coronapas atuutissaaq. Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
-
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
-
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
- 15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit. Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Danmarkimit angalasut
- Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Naalakkersuisut tamatuma atuutilernissaanut akunnerup missaannanngortoq nittartakkaminni nalunaarutigaat.
- Naalakkersuisut kommuninit arlalinnit piumaffigineqarput imigassanik aalakoornartortalinnik nioqquteqarneq imigassartortitsinermullu inerteqquteqarallarnissamik.
- Qinnuteqaatit akuerineqarput unnuap qeqqaniillu Kommune Kujallermi, Qeqqata Kommuniani aamma Kommuneqarfik Sermersuumi atuutilissapput.
Angerlarsimaffinni ernguttoqarnerusoq
Nunatsinni coronamik tuniluuttoqangaatsiarnera imigassamik matusinermut pissutaavoq.
Qeqqata Kommunia imigassamik nioqquteqarnermik sapaatit akunneri marluk matuma siorna inerteqquteqalerpoq. Tamanna unnummut atuukkunnaartussaagaluarpoq, borgmesterilli Malik Berthelsenip (Siumut) Naalakkersuisut sivitsuinissaat kissaatigaa.
Tamannalu ullumi akuerineqarpoq - kommunillu marluk allat tassunga aamma ilanngupput.
- Neriniartarfiit imerniartarfiillu siusinnerusumik matoqqatinneqartarnissaanut piumasaqaateqarnerata nalaani pisortat tungaaninngaanniit angerlarsimaffimmi imigassartornerup nakkutigineqarnerulerput angerlarsimaffinnilu "fiisterneq" annertusiartuaarnikuuvoq, Naalakkersuisut aalajangiinermi allapput.
- Angerlarsimaffimmi imernerulerneq meeqqanut aamma ilaqutariinnut kisimi eqquinngilaq, Covid-19-imilli tunillaassuisinnaaneq annerulersippaa, imigassartortillunimi tunilllaassuisinnaaneq eqqumaffigineqarnera annikillisarmat inuillu qaninnerulertarmata.
Killilersuutit arlallit unnuap-qeqqanit atuutilissasut
Naalakkersuisut nunatsinni killilersuutinik ullormi sukateriffianni inerteqquteqarallarnissamut nalunaarut takkuppoq.
Aasianni, Ilulissani, Kangerlussuarmi, Maniitsumi, Narsami, Nuummi, Qaqortumi, Qasigiannguani, Sisimiuni aamm Upernavimmi nunaqarfinnilu killilersuutit sapaatini akunnerni arlalinni atuutereersut nunatsinni tamarmi maanna atuutilerput.
Tassa imaappoq nunatsinni tamarmi coronapas aamma tamanit isersigineqarsinnaasuni qanermut assiaqut atuutilerpoq.
Malittarisassaq taanna januaarip ulluisa 26-annit februaarip ulluisa 14-iata tungaanut atuutissaaq.
AAMMA ATUARUK Nunatsinnut angalasut misissortittarunnaartut sumiiffinnilu killilersuutit nuna tamakkerlugu atuutilersut
Neriniartarfinnut imerniartarfinnullu isersinnaasut, qatserisartut amerlassusaasinnaasutut akuerisaasa affaannaat isertissinnaatinneqarnerat nunatsinni tamarmi aamma atuutilerpoq.
Misissueriaaseq allanngortinneqarpoq, taamaalilluni ikittuinnaat, tassa covid-imik tunillatsinnermi napparsimarululersinnaasut kisimik PCR-imik misissortissinnaalerlutik:
Tassa utoqqaat inuillu uummatikkut puatigullu nappaateqartut misissortissinnaapput.
Peqqisseqqittutut nalunaarutiginissaq, angerlarsimaffimmi misissornissaq kiisalu coronamik tunillatsissimaneq nuannertut nuallunnertullu kisimi misigisimanarpat napparsimmavimmut nakorsamulluunniit attaveqarani angerlarsimaffimmi mattusimaannarnissaq inuit namminneq akisussaaffiginerulerpaat.
Tamanna misissuisarfiit napparsimmaviillu malinnaasinnaajunnaarnerannik pissuteqarpoq
Neriniartarfiit, imerniartarfiillu unnukkut qulinut matusarnissaannut peqqussut aamma februaarip ulluisa aallaqqaataannut atuutissaaq.
Naalakkersuisut oqarnerat naapertorlugu tamanna nunatta "immikkoortut pingajuanniilerneranut tassa tuniluunnerup siammasinnerata ataavarneratalu peqqinnissaqarfimmut ilungersortitsineranik pissuteqarpoq."
Taamaammat misissuinermi periuseq allanngortinneqarpoq. Taanna sapaatit akunnerisa marluk matuma siorna allanngortinneqarpoq, tamatumalu kingorna napparsimarululersut kisimik PCR-imik misissortissinnaalerput. Allat sinneri tamarmik angerlarsiimmannassapput imminnullu misissuummik misissorlutik aammattaaq imminnut peqqissisutut nalunaarutigisassapput.
AAMMA ATUARUK Tunillatsissimasut nutaat 214-it – meeqqat marluk uninngasut
Nuummi coronamik tuniluunneq pissutigalugu imigassamik inerteqquteqarallarneq 2020-mi apriilimi aamma atuunnikuuvoq. Taamani angerlarsimaffinni erngunnerit coronamik tuniluuttoqarneranik kinguneqartartut, tamannalu meeqqanut kingunerluuteqartartoq tunngavilersuutigigineqarpoq.
Tamatuma kingorna Qeqqata Kommunia imigassamik nioqquteqarnermut aamma inerteqquteqarallarpoq. Maannakkut inerteqquteqarnerup saniatigut aasaq aamma inerteqqutigineqarpoq.
