Eqikkaaneq: WTO-mi ilaasortanngorniarneq pillugu nalunaarusiortoqassasoq

Nunatta nunarsuarmi niueqatigiit kattuffiannut, WTO-mut, nammineq ilaasortanngorniarnissani sulissutigissavaa?

Demokraatit siunnersuutaat taanna Inatsisartuni marlunngornermi aappassaaneerneqassaaq.

Naalakkersuisulli tamatuma Inuussutissarsiornermut Aatsitassanullu Ataatsimiititaliami oqaluuserineqareernerata kingorna allannguutissatut siunnersuuteqarput.

Naalakkersuisut ilaasortanngornissap suliniutigilerneqannginnerani, iluaqutissat ajoqutissallu pillugit nalunaarusiortoqaqqaarnissaa piumasaraat.

Nalunaarusiaq upernaakkut ataatsimiinnissamut tulliuttumut piareeqqassaaq.

Allannguutissatut siunnersuut Inatsisartunit tamatuma kingunerisaanik akuerineqarpoq.

Partiit arlaannaalluunniit, Múte B. Egedep (IA) nunanut allanut, inuussutissarsiornermut aatsitassanullu naalakkersuisup oqaaseqarnera eqqaassanngikkaanni, allannguutissatut siunnersuutip akuerineqannginnerani oqaaseqanngilaq.

Naleqqallu allannguutissatut siunnersuummik isornartorsiuinera eqqaassanngikkaanni.

Juno Berthelsenip (N) naalakkersuisut allannguutissatut siunnersuutaat pillugu isornartorsiuivoq. Naleqqap WTO-mut ilaasortanngorniarneq pillugu suliniuteqarnissaq kinguartinnagu, ingerlaannaq suliniuteqartoqarnissaa kissaatigaa.  Assi © : Markus Valentin / KNR

Oqaloqatigiinneq naammappoq, iliuuseqartoqarnerusariaqarpoq

Juno Berthelsen (N) oqalugiartarfimmukarami, naalakkersuisut Kalaallit Nunaat nammineerluni WTO-mut ilaasortaanissaa siunnersuutip siullermeerneqarnerani isumaqataaffigalugu oqarnerat, eqqaavaa.

Taamaattumik Naleqqap tamanna maannakkut sooq sulissutiginiarneqannginnera apeqquserpaa.

- Naalakkersuisut ilaasortanngornissamut siunnersuutip siullermeerneqarnerani soqutiginninnerarput,  Juno Berthelsen oqarpoq.

- Amerlanerussuteqartut isumaat tupigusuutigaarput, isumaqatigiinniarnerimmi ingerlaannaq aallartinneqarnissaat siunnersuummi piumasarineqarpoq.

Naalakkersuisut iluaqutissat ajoqutissallu pillugit nalunaarusioqqaarniarmata, taakkua marluk misissoqqaarnissaat immaqa naammanngitsoq, Juno Berthelsen oqarpoq.

Tamanna pinnagu qanoq ilaasortanngorniarneq pillugu pilersaarusiortoqarsinnaanerarpaa.  

- Naalakkersuisut allannguutissatut siunnersuutaat akuerineqarpat, nalunaarusiap erseqqinnerusumik isummernissamut aqqutissiuussinissaa  naatsorsuutigaarput.

- Tamatumunnga tunngatillugu iliuuseqarnerusariaqarpugut, Juno Berthelsen naggasiivoq.

EU aningaasartuutillu 

Ataatsimiititaliap isumaliutissiissutaani EU-mut attaveqarneq eqqaaneqarpoq.

- Danmarkip WTO-mut ilaasortaanera ilutigalugu Kalaallit Nunaat WTO-mut ullumikkut ilaasortaavoq, Kalaallit Nunaalli, Danmarkitulli, EU-mut tamnna ilutigalugu ilaasortaanngilaq, Danmarkimillu niuernermut oqartussaaffini EU-mut tunniunnikuuaa.

Aammattaaq ataatsimiititaliap oqaluuserisaa naapertorlugu nammineq ilaasortanngornissamik kissaateqarneq pissusissamisoorpoq.

- Tassunga tunngatillugu Kalaallit Nunaat namminersortutut akitsuusersuisoqarfioreernera puigorneqassanngilaq, aamma nunarput Danmarkilu, EU-p akitsuusersuiffigisaanut ilaasoq, ataatsimut akitsuusersuisoqarfiunnginnerat, allassimavoq.

Ataatsimiititaliap ilaasortanngorniarnermut atatillugu aningaasartuuteqarnissaq aamma maluginiarpaa.