Naalakkersuisut WTO-p aalajangiinera nalilersoqqaassavaat

Puisit amiisa EU-mut eqquteqqusaajunnaarsimaneri WTO-mit attatiinnarneqarpoq, taamatulli aalajangiineq Nunatsinnut kinguneqarsinnaanersoq, Naalakkersuisut maannangaaq nalilersinnaanngilaat, aalajangiineq atuaqqissaaqqaarniaramikku:
 
- Inuiaqatigiit ileqqorissaarnissaasa illersorneqarnissaannut atatillugu, puisit amiisa EU-mut eqquteqqusaajunnaarsimaneri attatiinnassallugu pingaaruteqarpoq, WTO naliliivoq.
 
Puisit amiinik eqqusseqqusinnginnermi naggueqatigiit Inuit ilaatinneqannginnerat Norgemut Canadamullu immikkoortitsinerusoq, eqqartuussivimmi aamma aalajangiunneqarpoq.
 
WTO-p aalajangiinera Canadamit iluarineqanngeqaaq.
 
Puisilli amiinik EU-mut eqqusseqqusinnginerup WTO-mit attatiinnarneqarnera Nunatsinnut qanoq kinguneqassanersoq, Naalakkersuisut maannangaaq nalilersinnaanngikkaat, Nunanut Allanut Pisortaqarfiup pisortaata Kai Holst Andersenip oqaatigaa.
 
- Eqqartuussivik aalajangiivoq, aalajangiinerlu quppernernik 100-likkaanik qupperneqarluni. Kalaallit Nunaannut eqquinersoq eqquinnginnersorluunniit ersarinngilaq. Nalilersugassat amerlaqaat, eqquissanersut eqquissannginnersulluunniit maannangaaq nalilersinnaanngilarput, Nunanut Allanut Pisortaqarfiup pisortaa Kai Holst Andersen oqarpoq.
 
Puisilli amiisa EU-mut eqquteqqusaajunnaarsimanerannik aalajangernerup atuutiinnarneqarnera uumasunik illersuiniaqatigiiffinnit nuannaarutigineqarpoq, tassami uumasut illersorneqarnissaasa pisariaqassusaannt tamanna takussutissaalluartoq uumasunik illersuiniaqatigiiffinnit oqaatigineqarami.