Timmisartuussinerit akikinnerusut ukiunilu tallimani najugaqarsimanissaq: Ukiaanerani ataatsimiinnissanut siunnersuutit ilaat aajuku
Inatsisartuni ukiaanerani ataatsimiinnerit tallimanngorpat aallartissapput.
Siulittaasoqarfik ataatsimiinnerit marlunnut avissallugit aalajangersimavoq, soorlu ukioq manna upernaakkut ataatsimiinnermi taamaattoqartoq.
Ukiaanerani ataatsimiinnerup affaa siulleq novembarip 19-ianni naammassissaaq, tullialu januaarip 29-anni aallartissalluni.
Ataatsimiinnerni suliassarpassuaqarnera pissutigalugu taamatut avinneqarpoq.
Ukiaanerani ataatsimiinnermi ukiup tullianut aningaasaqarnermut inatsisissamik akuersinissaq oqaluuserisassani, pisarnertut, pingaarnersaassaaq.
Taamatuttaaq arlalinnik suliniuteqarpoq, taakkulu najukkani suliniutitut aaqqissuussaanikkulluunniit demokratiskiusumik allannguutitut agguarneqarsinnaapput.
Kujataata Tunullu ineriartortinneqarnissaat
Tusagassiuutit kujataata Tunullu kitaanitut ineriartortinneqarsimannginnerat sivisuumik allaaserisarsimavaat.
Taamaattumik Nivi Rosingip (IA) naalakkersuisut kujataani inuussutissarsiornerup aalisarnerullu qanoq ineriartortinneqarsinnaanerannik kingusinnerpaamik aappaagu ukiaanerani ataatsimiinnissamut siunnersuuteqartartussanik suleqatigiissitaliornissaat siunnersuutigaa.
Tunumut tunngatillugu, Mette Arqe-Hammeken (N) naalakkersuisut Tasiilami, Kulusummi, Nerlerit Inaanni Ittoqqortoormiinilu ukioq kaajallallugu timmisartuussisoqartarnissaa qulakkeertariaqaraat siunnersuutigaa.
Aammattaaq naalakkersuisut Kalaallit Nunaanni najugaqartunut timmisartumut bilitsinik akikillisaaviginninnissamut aaqqissuussinissaq misissoqqullugu piumasaraa.
Tunumut tunngatillugu siunnersuut kingulleq Gerth Mikaelsenimit (N) saqqummiunneqarpoq. Taassuma Tasiilami Tasiilallu eqqaani innuttaasunut pilersuinerup qulakkeernissaanut, suliffissaaleqisut ikilisinnissaannut suliffissanillu qulakkeerinninnissamut naalakkersuisut iliuusissatut pilersaarusiornissaat kissaatigaa.
Tamat oqartussaaqataanerat suleqatigiinnerlu
Aalajangiisartut Savalimmiut naalagaaffiunngikkaluarluni nunarsuarmi niueqatigiit kattuffiannut (WTO) qanoq ilaasortanngorsinnaanera ukioq kingulleq septembarimi siunnersuuteqarput.
Demokraatit Inatsisartuni gruppiata siunnersuutigaa, naalakkersuisut Kalaallit Nunaata ilaasortanngornissaa suliniutigissagaat.
Aki-Matilda Høegh-Dam (N) aamma peqatigiiffimmik nutaamik pilersitsinissamik siunnersuuteqarpoq. Taassuma naalakkersuisut suleqatigiiffissamik pilersitsinissaq siunertaralugu Nunavut naalakkersuisuinut inatsisartuinullu attaveqartikkusuppai.
Naalakkersuisut suut pillugit Inatsisartunut paasissutissiisussaanerat ukiup siuliani ukioq mannalu oqallisigineqarpoq. Taamaattumik Isak Johannesenip (N) naalakkersuisut paasissutissiisarnissaq pillugu malittarisassaliornissaat kissaatigaa.
Malittarisassat naalakkersuisut nakkutilliisarfiit pioreersut atorlugit naammaginartumik ersersinneqanngitsumik iliuuseqartillugit, paasissutissiisoqarnissaannik qulakkeerinnittuussapput.
Kuno Fenckerillu (N) naalakkersuisut najukkami piumasaqaammut killigititap sivitsorneqarnissaanut siunnersuusiornissaat kissaatigaa.
Danskisut innuttaassusilik nunatsinni qaammatini arfinilinni najugaqareeraangami Inatsisartunut qinersisinnaatitaanngortarpoq. Kuno Fenckerip tamanna ukiut tallimanngortinneqarnissaa kissaatigaa.
