KNR TV tallimanngornermi decembarip arfernani nal. 19.30 TV-kkut aliikkusersuinermik alutornarluinnartumik aallakaatitsissaaq, Nunatsinnilu atisanik ilusilersuisartut piginnaaneqarnerpaat sisamat atisaliaminnik nutaanerpaanik saqqummiussissapput kalaallillu atisaliortartut immikkuullarissumik kulturikkullu pingaarutilimmik ilusilersuisarnermikkut nunani tamalaani atugaasunut naapertuuttumik suli ingerlarsortuarsinnarnertik takutissallugu.

Flake

Flakemik pilersitsisut marluupput tamarmillu Mariamik ateqarlutik, aappaa Motzfeldtimik kinguliaqarpoq aappaalu tassaalluni CrossFitimi Europami pissartaasoq Maria Grødem. Tamarmillu arnaapput timersortartut, qungutsarissut assilitittartutullu Voguemeersutut isikkullit. Atisaliaat timersortarfissuarni, timigissartarfinni cafénilu takussaasupilussuupput. Aallarnisaasullu marluusut tamarmik namminersortuupput suliniutinillu arlalinnik ingerlataqarlutik. Aperaakkalu isumassarsiaminnik qanga piviusunngortitsisimanersut.

- Piareersaatigut isumassarsiavullu 2022-miilli aallartipput, taamanikkut nioqqutissanik misileraavugut. Nioqqutivullu siulliit 2023-mi saqqummersippagut, niuerfillu misilittarniarlugu nammineerluta tuniniaaqqaarpugut. Ukioq taanna Pisiffik/Torrak Fashion saaffigaarput, qujanartumillu suleqatigerusuppaatigut, tamannalu nuannaarutigeqaarput, Maria Motzfeldt aamma Maria Grødem oqarput.

Nittaalaq 

Flake tassaavoq oqaatsip snowflakep naalisarnera imaluunniit nittaalaq – taamatullu taaguusiineq nittaallat tamarmik immikkut iluseqartiternerannik aallaaveqarpoq, soorlu aamma inuit tamarmik immikkuullarissuusut. KNR-ip Atisanik takutitsinerani Flakemeersut atisaliaminnik pisoqaanerusunik nutaanerpaanillu takutitsissamaarput. 

Atisat ilaat nammineerluta ilusilersugaraagut suliffissuillu atukkatta malittarisaannut naleqqussartarpagut – assersuutigalugu tightsit tassaanerusarput malitassat aalajangersimasut malillugit suliaasut, taakkulu naqqanit tamatigut ilusilersorneq ajorpagut. Atortussanilli toqqaanissaq isikkuisalu naleqqussarnissaat sunniuteqarfigisarpagut.