KNR TV tallimanngornermi decembarip arfernani nal. 19.30 TV-kkut aliikkusersuinermik alutornarluinnartumik aallakaatitsissaaq, Nunatsinnilu atisanik ilusilersuisartut piginnaaneqarnerpaat sisamat atisaliaminnik nutaanerpaanik saqqummiussissapput kalaallillu atisaliortartut immikkuullarissumik kulturikkullu pingaarutilimmik ilusilersuisarnermikkut nunani tamalaani atugaasunut naapertuuttumik suli ingerlarsortuarsinnarnertik takutissallugu.

ISAKSEN

ISAKSEN 2002-mi Nickie Isaksenimit tunngavilerneqarpoq, arnallu taassuma arnaqatimi atisaasiviinik allanngortitsisuusup ilaatigut ilingasunik nujaqarnini ilisarnaatigaa. Inuuvoq qungujulasoq illarpalunneralu ungasianit tusaaneqarsinnaasarpoq.

Arnaq qungutsarissoq mersortartutut aamma atisanik ilusilersuisartutut Tuluit Nunaanni London College of Fashionimi ilinniagaqarpoq. Namminerisaminik atisat meqqiannik ukiut 20-t sinnerlugit pigisaqarpoq, arnaavorlu imminut tatigisoq arnallu atisalersortaasiannik ilisimasalik.

- Minimalisme, nunat avannarlermiorpaluttut mersortartutullu peqqissaarniartuunissaq isumassarsiorfigisarpakka. Atisat pisariitsuussapput, iluarinarlutik, atoruminarlutik nuannersuullutillu, ullut tamaasa, Nickie Isaksen oqarpoq.

Akisussaassuseq, avatangiisit tunisassiornerlu

Atisat meqqiat ISAKSEN piujuartitsinissamik tunngaveqarpoq, atortussianik avatangiisinut mingutsitsinngitsunik atuisuulluni, maangaannartitsinissamik mingutsitsinermillu annikillisaanissamik siunnerfeqarluni amerlanaarinaveersaarluni tunisassiortarpoq. Atisanik qaqugukkulluunniit atorneqarsinnaasunik, atoruminartunik, pitsaasunik sivisuumillu atasinnaassuseqartunik ukiorpassuarnilu atugarineqarsinnaasunik ilusilersuinissaq suliffeqarfiup isumagaa.

Isaksen Designip atisaliai arnanit assigiinngitsunik iluseqartunit atorneqarsinnaapput, pæritut iluseqaraanni, tuattuugaanni, imaluunniit iviangikikkaanni iviangikkaajugaanniluunniit. Nickie Isaksenillu atisanik takutitsinissaq qilanaareqaa, atisaliaami nutaanerpaat KNR unnukkut toqqaannartumik aallakaatitsilerpat nunarsuarmut tamarmut takutinneqassammata.

- KNR-ip atisanik takutitsinermik toqqaannartumik aallakaatitsineranut peqataanissara, atisaliamalu nutaanerpaat isiginnaartartunut tamanut takutinnissaat qilanaareqaara. Assassorluni suliaqarnermik ilusilersuisarnermillu soqutigisaqarnerma takutinnissaanut oqaluttuarinissaanullu, aammalu nunatsinneersut isumassarsiorfigisarnerisa atisaliortarninnut qanoq sunniuteqarsimanerata oqaluttuarinissaannut immikkuullarissumik periarfissaqassaanga. Neriuppunga atisanik ilusilersukkat nutaaliaasut ileqqutoqqat piorsarsimassutsikkullu sorlaqarfigisat nersorniarnissaannut – peqatigisaanillu nunani tamalaani atisanut naapertuutsillugillu saqqumilaartinnissaannut - isumassarsiortitsillungalu takutitsisinnaassallunga, Nickie Isaksen naggasiivoq.