KNR TV tallimanngornermi decembarip arfernani nal. 19.30 TV-kkut aliikkusersuinermik alutornarluinnartumik aallakaatitsissaaq, Nunatsinnilu atisanik ilusilersuisartut piginnaaneqarnerpaat sisamat atisaliaminnik nutaanerpaanik saqqummiussissapput kalaallillu atisaliortartut immikkuullarissumik kulturikkullu pingaarutilimmik ilusilersuisarnermikkut nunani tamalaani atugaasunut naapertuuttumik suli ingerlarsortuarsinnarnertik takutissallugu.

Inuit Quality Clothes of Greenland

Pisuttuartilluta, imaluunniit niiverniartilluta meqqi Inuit, qularnanngitsumik takusarsimassavarput. Inuit ilisarnaatigaa arnap qilertillip, angutillu ilisarnaataat. INUIT Quality Clothes of Greenland 2012-imi, Hanne Kristiansennimit aamma Dorthea Rødgaard-imit pilersinneqarpoq. Pilersinneqarneraniilli, Inuit meqqi kalaallinit tigulluarneqarpoq, atorluarneqarlunilu.

- Atisaliavut silaannaap allanngoriartorneranut silattalu sorraassinnaaneranut pinngortitamullu kusanarluinnartumut tulluarsagaapput minnerunngitsumillu nunatta inuinut tulluussagaallutik. Atisaliat suleqatigiiulluta ilusilersortarpagut. Aallaqqaammulli atisat nunatsinnut tulluarsagaanissaat, ukiumi silatta allanngorarsinnaanerani kissasimaartitsisinnaanissaat oqorsarluarsimagaluarlutalu aalasinnaalluarfeqarnissarput pingaartitaraarput, Hanne Kristiansen aamma Dorthea Rødgaard taama oqarput.

G-strennginit kavaajanut

Inuit Quality Clothes of Greenland-ip atisaliai, ulluinnarsiutaapput atoruminarlutillu. Inoorlaaniit utoqqarnut, Inuit meqqilinnik tulluarsakkanik atisaqarsinnaannissaat piginnittunit eqqarsaatigineqarsimapput. Inuit meqqii atorlugit, uffareerlutit atisalersorsinnaavutit iluatigut atisatit G-strennginut allaat, tassami Inuit-ip atisaliai tujuluuaqqaniit qarlinut pigineqarmata. Inuit atisaliatik nutaat, ukiup ingerlanerini saqqummiuttarpaat. KNR-illi modeshowertitsinissaannut saqqummiutassaminnik, qilanaartuutissaqarput.

- Qilanaartuutigisinnaavarput kinaassutsinut ilutsinullu assigiinngitsunut atisat takutinneqassasut. Juullimullu ilaqutariinnut atorneqarsinnaasunik tunissutaasinnaasunillu isumassarsititsisinnaassalluta, Hanne Kristiansen aamma Dorthea Rødgaard taama naggasiipput.