KNR TV tallimanngornermi decembarip arfernani nal. 19.30 TV-kkut aliikkusersuinermik alutornarluinnartumik aallakaatitsissaaq, Nunatsinnilu atisanik ilusilersuisartut piginnaaneqarnerpaat sisamat atisaliaminnik nutaanerpaanik saqqummiussissapput kalaallillu atisaliortartut immikkuullarissumik kulturikkullu pingaarutilimmik ilusilersuisarnermikkut nunani tamalaani atugaasunut naapertuuttumik suli ingerlarsortuarsinnarnertik takutissallugu.

Nuuk Couture

Nuuk Couture 2010-mi tunngavilerneqarpoq, atisaliorfiullu Avittat isumassarsiorfigalugit ilisarnaatillip tunuaniippoq arnaq aappaluttunik nujalik inussiarnerluinnartorlu, Louise Berthelsen. Louise Nuup illoqarfiata qeqqani pisiniarfiuteqarpoq, pisiniarfimmullu iseraanni tamatigorluinnangajak naapitassaasarpoq, siunnersuinissaminullu piareersimajuaannarluni. Atisanik ilusilersuineq mersornerlu Louisemut nutaajunngilaq, meeraallunilimi aallutilerpaa ilusilersuisarnerlu suli soqutigisarivissorlugu.

- Meeraallunga mersortalerpunga. Anaanama ilinniartippaanga. Sermersuup nipilersoqatigiivisa uniformitaassaat ilusilersorlugillu mersortussanngorakkit suliffeqarfik aallartippara. Namminerlu ilusilersukkannik suliaqartalerama assukkersuutaanissaat eqqarsaatiginngikkaluarpara, kulturikkulli kingornussatta ilaanik tulluusimaarutiginnilluta ulluinnarni atorsinnaasatsinnik suliaqarusullunga, Louise Berthelsen oqarpoq.

Kusanartuliortartoq

Nuuk Couturemi pisortaq, tassalu Louise Berthelsen, atisaliaminik nammineerluni ilusilersuisarpoq nunanilu allani mersortittarlugit. Assuataarutissalli, pingaartumillu atisat Nuuk Couturemeersut, nammineerluni titartartarpai, ilusilersorlugit mersorlugillu. Taamaattumillu Louisep qiortaanermut mersornermullu akunnerpassuit atorsinnaasarpai, aamma sulinngiffeqaraangami. Namminerli oqarneratut, - Suliarisartakkat nuannaralugit nuannertuaannarpoq. Louisep sullittakkani nammineq naapittarpai, sullitaalu tassaapput meeqqanit utoqqarnut.

- Sullitakka oqaluttuaraangata atisamik kusanarnersaat Nuuk Couturemeersuusut assut nuannaartarpunga qujamasullungalu, Louise tulluusimaarluni oqaluttuarpoq.

Louise KNR-ip atisanik takutitsinissaanut qilanaartupilussuuvoq. Atisallu tamaasa piareerniassammata maannakkorpiaq unnuit arlallit igaffimmini issialluni mersortarpoq.