Politikki

Lars-Emil siulittaasunngorniunnissaq pillugu isertukujuttoq

NUTARTIGAQ: Partiimik Siumumik pilersitseqataallunilu siulittaasuusimasoq, Lars-Emil Johansen, partiimini siulittaasussatut qinigassanngortippoq. Siumup Aasianni immikkoortortaqarfiata siulittaasua, Enok Sandgreen, taama allappoq.

Allattoq Jens Thorin, Apollo Jeremiassen

oktobarip 17-at 2014 13:21

Enok Sandgreenip taama inassuteqarnerminnut tunngavilersuutigaa, Lars-Emil Johansen misilittagaqarluarmat politikeriullunilu nukittooq, partiimini katersuutsitsisinnaasoq.

AAMMA ATUARUK Siumut immikkoortortaqarfiisa Lars-Emil qinigassanngorteqquaat

- Siumup atugarisai imaannaangitsut eqqarsaatigalugit inummik misilittagaqarluartumik nikittuumillu sassartoqartariaqartoq Siumut Aasiaat isumaqarpoq, Enok Sandgreen taama allappoq.

- Lars Emil Johansen ullumikkut utoqqaliarsaaleraluarluni suli nunarput tamaat isigalugu aqutsilluarsinnaasoq ataatsimoortitsisinnaasorlu inatsisartuni naalakkersuisunilu katersuuffiusinnaalluartoq, Aasianni Siumup siulittaasua allappoq.

AAMMA ATUARUK Doris Jakobsen Siumumi siulittaasunngorusuppoq

Aasianni Siumup immikkoortortaqarfiani siulittaasoq, Enok Sandgreen taama oqarpoq, Lars-Emil Johansenilu siulittaasussatut piukkunneqartoq ima oqaluttuaralugu.

- Lars-Emil Johansen inuk qanilaartuuvoq aamma nalunngilaput inuuneq alla ukiuni makkunani atulersimagaa. Lars-Emil Johansen nakuulluni politikkikkut ingerlaqqippoq taamaattumillu isumaqarpunga, Lars-Emil Johansen siulittaaasutut ataatsimoorfiusinnaalluartoq, Enok Sandgreen oqarpoq.

Aalisariutit avataasiortut piginneqatigiillutik kattuffianni, APK-mi, Lars-Emil Johansen siulittaasuunermi nalaani, timmisartumut ilaanermi aningaasanik 15.000 koruuninik atuereernermi kingorna akiliinngitsoorsimasutut eqqartuussivitsigut 2007-mi pineqaatissinneqarpoq akiliisussanngortinneqarluni. Tamannalu pivoq Lars-Emil Johansen Aningaasaqarnermut Naalakkersuisutut taamani ivertinneqarnerata aqaguani.

Lars-Emil Johansenilli eqqartuussaasimanera Enok Sndgreenip isummerfigerusunngilaa, pineqaatinneqarsimannginneralu innersuussutigalugu.

-Politikereq ingerlajuartussaavoq arlaannilluunniit unnerluutigisaagaluaruni pineqaatissinneqarsimanngikkuni arlaannilluunniit kinguneqartinneqarsimanngippat. Taamaattumik tunngavissaqanngilaq Lars-Emil Johansen aningaasanik atornerluisimaneranik oqalunneq.

Aasianni Siumup immikkoortortaqarfiani siulittaasoq, Enok Sandgreen oqarpoq.

AAMMA ATUARUK Kielsen Siumut siulittaasussaatut sassarpoq

Lars-Emil Johansen politikkikkut suliaqarnissamut siullermik qinigaavoq 1971-imi, Landsrådimut, Inatsisartut maanna siuliinut. Landsrådimi ilaasortaatilluni Jonathan Motzfeldt aamma Moses Olsen peqatigalugit politikkikkut qinikkat suleqatigiiffiat nunatsinni siulleq pilersippaa.

Politikkikkullu suliniaqatigiiffioriarluni Siumut partiitut 1977-imi pilersinneqarpoq.

68-inik ukiulik Lars-Emil Johansen partiimini 1987-imit 1997-imut siulittaasuuvoq, piffissamilu 1991-imit 1997-imut Naalakkersuisuni siulittaasuulluni.

Pisoq pillugu Lars-Emil Johansen aatsaat ualeru oqaloqatigineqarsinnaalluni KNR-imut oqaatigaa.

AAMMA ATUARUK Nick Nielsen Siumumi siulittaasussatut sassarpoq

Lars-Emil siulittaasunngorniunnissaq pillugu isertukujuttoq

Aamma atuaruk