Siumut immikkoortortaqarfiisa Lars-Emil qinigassanngorteqquaat
- Uggorilaarpara Lars-Emil Johansen siulittaasussatut qinigassanngortinngimmat, Siumup Nanortalimmi immikkoortortaqarfiani siulittaasoq, Manasse Semsen, KNR-imut oqarpoq.
Siumut Nanortalimmi immikkoortortaqarfiata Lars-Emil Johansen siulittaasumut qinigassanngortinnissaanut kaammattorpaa.
Aamma atuaruk Doris Jakobsen Siumumi siulittaasunngorusuppoq
Lars-Emil Johansen inuppalaartuuvoq aalajangersinnaassuseqartoq suleqateqarsinnaassuseqarlunilu, ukiuni amerlasuuni naalakkersuinermik misilittagaqarluni, Manasse Semsen, Siumut Nanortalimmi siulittaasoq oqarpoq.
Siumumi siulittaasumut qinersinermi, arfininngorpat pisussami, Lars-Emil Johansenip siulittaasutut qinigassanngortinnissaanut Siumut Nanortalimmi immikkoortortaqarfia kisimi kaammattuinngilaq.
Sisimiunit aamma kaammattorneqarpoq
Siumup Sisimiuni immikkoortortaqarfiani ataasinngormat ataatsimiinnermi oqaluuserineqarpoq, Lars-Emil Johansen siulittaasutut qinigassanngortinnissaanut kaammattorneqarnissaa, Siumup Sisimiuni immikkoortortaqarfiani siulittaasoq, Ejnar Lundblad, oqarpoq.
Lars-Emil Johansen ukiorpassuarni politikeritut misilittagaqarpoq, pisullu kingulliit eqqarsaatigalugit partiip tusaamaneqarnera ajunngitsumut kivissinnaagaa, Ejnar Lundblad oqarpoq.
Aamma atuaruk Kielsen Siumut siulittaasussaatut sassarpoq
Siumut Sisimiuni immikkoortortaqarfia, immikkoortortaqarfiit allat assigalugit, Siumut nuna tamakkerlugu immikkut ittumik arfininngorpat ataatsimeersuarnerani oqarasuaatikkut ataatsimeeqataassaaq, siulittaasumullu qinersineq sioqqutilaarlugu Ejnar Lundbladip aalajangissavaa kina siulittaasutut qinissanerlugu.
Siumut Nanortalimmi immikkoortortaqarfiata ippassaq ataatsimiinnermi, aalajangerpaa, Kim Kielsen siulittaasutut qinerneqassasoq, Lars-Emil Johansen siulittaasutut qinigassanngortinngippat.
Tasiilami Kim Kielsen aalajangiuppaat
Siumup Tasiilami immikkoortortaqarfiani Kim Kielsen siulittaasutut qinissallugu aalajangerput.
- Kim Kielsenimut tatiginnippugut - partiip ajornartorsiornerani uivernermi nikallorani sulivoq, Laura Taunajik oqarpoq, taassumalu neriuutigaa siulittaasunngortussaq nikallujaatsuussasoq, mianersortoq aammalu atornerluinernik ingalassimmaarinnittuussasoq, Siumup Tasiilami immikkoortortaqarfiani siulittaasoq, Laura Taunajik, KNR-imut oqarpoq.
Aamma atuaruk Nick Nielsen Siumumi siulittaasussatut sassarpoq
Aasiannit Lars-Emil aamma sassaqquneqarpoq
Aasianni Siumut, ilaasortaminut ataatsimiisitsereerluni, aamma aaliangerpoq siulittaasussatut sassartut saniatigut Lars-Emil Johansen siulittaasussatut sassarnissaa kaammattorniarlugu.
- Qiningassanngortittut allat sulilluarsinnaasutut isigaagut politikkikkulli katersuuffiussagaanni aqutsinermik misilittagaqarluarnissaq pingaaruteqarmat pineqartoq kaammattorsimavarput sassaqqullugu. Siumut Aasianni siulittaasoq, Enok Sandgreen, KNR-imut allappoq.
Lars-Emil Johansen Siumut siulittaasuattut qinigassanngortissanerluni suli aalajanginngilaq.
Siumut nuna tamakkerlugu immikkut ittumik ataatsimeersuarnera arfininngorpat Nuummi kulturikkut illorsuarmi Katuami ingerlanneqassaaq. Siulittaasuugallartup nalunaaruteqarnerata kingorna siullittaasumik qinersisoqassalluni.