Erik Jensen KGB-mut tunngatillugu paasisat pillugit: Lars-Emil Johansen suli tatigaara
Naalakkersuisunut Siulittaasuusimasup Lars-Emil Johansenip sakkutuut naalagaanik KGP-meersumik 70-ikkunni 80-ikkunnilu attaveqartarsimaneranik Ekstra Bladet marlunngormat allaatigisaqareersorlu nunatsinni politikkikkut aalassattoqarpoq.
Pineqartup attaveqartarsimanini KNR-imi ilanngutassiortut ilaannit apersuinermini nassuerutigaa. Taannali KGB-mit pisarineqarsimasutut ikinngutaasutulli imminut isiginngilaq.
Lars-Emil Johansenillu apersorneqarnermini partiimini Siumumi tamanna aamma ilisimaneqariissasoq oqaatigaa:
- Soorunami oqaatiginikuuara, ullumikkullu aamma oqaatigissallugu, taanna oqarpoq.
Siulittaasoq eqqartuussinianngitsoq
Tamanna tunngavigalugu siulittaasuusimasup Sovjetunionimiut kilitsissiaasa kiffartuussisuinut attaveqartarsimanera Siumumi maanna siulittaasup Erik Jensenip ilisimaneraa, KNR-imi ilanngutassiortut ilaasa tusarniaavigaat.
Lars-Emil Johansenip russit attavigisarsimagai maanna siulittaasup ilisimaaralugu oqaatigaa, tamannali paasissutissaq imminut nutaajusoq oqaatigaa:
- Uanga aatsaat qaammatialuit matuma siorna apersorneqarsimanini attavigineqarsimanini saqqummiummagu paasivara. Massakkut tusagassiorfitsigut sammineqartoq maluginiarpara, kisianni uanga aatsaat piffissami ungasissorsuunngitsumi aatsaat paasivara tassa attavigineqarnermi kingorna una uannut ilisimatitsissutiginikuuaa, Siumup siulittaasua oqarpoq.
Erik Jensenilli Lars-Emil Johansenip KGB-meersunut suut eqqartortarsimanerai ilisimanagit erseqqissaatigaa. Taamaammat parteeqatini tamanna pillugu eqqartuukkusunngilaa:
- Ukiut 44-t missaat matuma siorna pisimasoq sunillu qulequttanik samminnittoqarsimanersoq uanga tigusimasaqartinnata nalilersoruminaatsippara. (...) Uppernarsaatit paasisakka killeqarmata taamaattumik annertunerusumik iliorsinnaanngilanga, taanna oqarpoq.
Ikinngutigut kikkuusut nalunngilarput
Erik Jensenilli siulittaasuusimasup ajortumik isumaqarluni KGB-mut attaveqartarsimanissaa takorlooruminaatsippaa:
- Naatsorsuutiginngilluinnarpara nunatsinnut killuussiniarnermik allatulluunniit ajortumik kinguneqartitsiniarnernik suliaqarsimanissaa, takorlooruminaatsippara taamatut suliaqartoqarsimassasoq, Siumup siulittaasua oqarpoq.
Erik Jensenilli nammineq pissaanillit akeraasinnaasullu imminut takornartaasut oqaloqatiginissai takorloorsinnaanagit erseqqissaatigaa:
- Naatsorsuutiginngilluinnarpara nunatsinnut killuussiniarnermik allatulluunniit ajortumik kinguneqartitsiniarnernik suliaqarsimaneranik takorlooruminaatsippara taamatut suliaqartoqarsimassasoq.
- Naqissuseqqiinnassavara: nunarput avammut nunarsuarmioqataanermigut pisuussutiminik niueruteqarnermini nunat assigiinngitsunik oqaloqateqartarpoq, mianerisassallu aamma mianereqqissaarneqartarput, ikinngutigut kikkuusut aamma nalunnginnatsigit.
KGB-mut attaveqarsimanera kinguneqartitsissutaassanngitsoq
Erik Jensenilli oqaaseqarpallaartoornissaq erseqqarippallaarnissarlu mianersuuttarpai.
Naallu Lars-Emil Johansenimut tatiginnikkaluarluni paasissutissat tamarmik suli saqqummiunneqanngillat. Taamaammat suut tamarmik qulakkeerlugit oqaatigisinnaanngilai:
- Tassa inuttaata saqqummiummagu soorunami tassa upperivara aamma tatigivara taamatut pisoqarsimanerminik oqaluttuaa. Kisianni qanoq uppernarsaatit ittuunersut qanorlu pisoqarsimaneri takunikuunagit annerusumik oqaaseqarsinnaanngilagut suna eqqartorneqarsimava susoqarsimava ilaalu ilanngullugit paasissutissat sukumiisut takusimatinnagit annerusumik oqaaseqarsinnaananga ippassaq oqariartuutigaara taamaattumik oqaaseqarfigiuminaappoq.
Partiimi ikinngutigiinnerup tatigeqatigiinnerullu allanngunnginneranik Erik Jensen aalajangersimaartoq, KNR-imi ilanngutassiortut toqqarlugu apeqquteqaataannut akissuteqarpoq.
- Siumumi siulersuisuunerit nalilersorsimanngilarput, aamma eqqartorsimanngilarput makkua qanoq kinguneqartinneqarnissanut tunngassuteqartut kisianni, oqareernittuut: naatsorsuutigilluinnarpara tatigilluinnaqqissaarpara, inuttaata nammineq oqaatigisaatut, unneqqarissumik ammasumillu oqaatigisaatuut: nunarput inuilu pillugit suliniarnermini oqaloqateqartarsimasoq.
