Qeqqata Kommuniani snusit inerteqqutaalerput, tamannalu isumaqatigiinngiffiusoq

Qeqqata Kommuniani kommunimi sulisut suliffiup nalaani snusitoqqusaanngillat. Tamanna septembarip naanerani atuutilerpoq.

Taamaalilluni kommunimi sulinerup nalaani nikotinit inerteqqutaasut allattorsimaffiat annerulerpoq. Pujortartarnermi inerteqqutaareerpoq.

Nikotininillu inerteqquteqarneq isumaqatigiinngissutaavoq. Qeqqata Kommuniani borgmesterip, Malik Berthelsenip siunnersuut ajorinngikkaa Atassutip inuusuttaasa tamanna 'kalluinerunerarpaa' – inerteqquteqarnerummi nutaap inuup nammineq taqqagaanut akuliunnerusoq taakku isumaqarput.

Tamannalu Atassutip inuusuttaani siulittaasup, Angutinnguaq Schmidtip ernumanartoqartippaa.

- Taamatut inerteqquteqalersitsineq ernumanarpoq.

Inerteqquteqalerneq nutaaq killissamik qaangiinerusoq

Taassuma pujortaqqusiunnaarneq, 2022-mili atuutilersinneqartoq paasisinnaavaa, pissutigalugu tassani suliffiup nalaani pujortariartoqartarpoq, tamannalu suleqatinut akornutaasinnaalluni, kisianni snusinut tunngatillugu qaangiinerusoq taanna tusagassiuutinut nalunaarummi allappoq.

- Snusernissaq inuup nammineq toqqagarivaa namminerlu kisimi eqqugaassalluni. Inuttut nammineq toqqagassaavoq sulisup nammineq akisussaaffia. Taamaammat isumaqarpunga Qeqqata Kommunia sulisitsisullu allat taamatut inuit sulisullu sinnerlugit aalajangiisinnaasussaanngitsut, taanna allappoq.

Malik Berthelsenip inerteqquteqalerneq allatut isigaa, taassumalu nikotinimik atuinerup annikillisinnissaata iluaqutissartai eqqartorneqarunnartut uggoraa, taanna tusagasiuutinut nalunaarummi allappoq.

- Nunatsinni innuttaasut 52%-iisa pujortartarnerat affaannanngoraluarpat tamanna nunatsinnut qanormitaavami sunniuteqassagaluarpa? Imaluunniit inuiaqatigiinni nikotinimik atuiffiunngiivikkaluarutta inuuneqqortussuserput ukiunik qanormita amerlatigisunik qaffassagaluarpa?

Qanoq ulorianartiginera tamanit naluneqanngitsoq

Borgmesterip nikotinimik atuinerup qanoq ulorianartiginera kikkunnit tamanit naluneqanngitsoq erseqqissaatigaa, itisiliillunilu:

- Aamma qularinngilara pujortartut amerlasuut pujortartarnerminnik unitsitserusukkaluarlutik tupat akuinik pinngitsuuisinnaajunnaarsimanertik pissutigalugu unitsitsinissartik ajornartorsiutigisaraat. Taannaavorlu sulinerup nalaani nikotininik atuinnginnissamik aalajangiinitsinnut pissutaasoq annerpaaq, taanna tusagassiuutinut nalunaarummi allappoq.

- Tamannami inuunermi ajoqutiginatigu iluaqutigiinnartussaavarput, taanna allappoq. Assi © : KNR

Atassutilli Inuusuttaasa inuit nammineq aalajangigassaannut inerteqquteqarneq kalluisoraa.

- Sulisut qaqugukkut snuseqqusaanersut aalajangersornialissagutsigu ila sumut killeqassava?

- Kommunip tullinnguullugu aalajangernialissanerpaa aamma suut taquarisassanerigut? Immaqaluunniit aamma peqqinnissaq tunngavilersuutigalugu imeruersaatit sukkullit inerteqqutaatinnialissavaat?, Angutinnguaq Schmidt allappoq.

Maligassiuisut imaluunniit nammineq aalajangiisinnaanermik attassineq

Malik Berthelsenip inersimasut peqqinnartunut tunngatillugu meeqqanut inuusuttunullu maligassiuisuussasut ilaatigut tunngavilersuutigaa.

- Nunatsinni nikotinimik atuineq annikillisissagutsigu inersimasut uagut taakkuuvugut nikotininik atuinerup takussaannginnerulernissaanik maligassiuisutut siuttuusussat, taanna isumaqarpoq.

Borgmesteri aalajangiisinnaagaluaruni kalaallit inuusuttut ukiut quliinnaat 20-lluunniit qaangiuppata nikotinimik atuinnginnerpaalernissaat sulissutigissavarput.

- Angusinnaagaluarutsigu qanoq tulluusimaarnartigissagaluarnersoq. Erseqqissaatigissavaralu Qeqqata Kommunia nunarsuarmi kisiartaanngimmat sulinerup nalaani pujortaqqusinnginnermik aalajangiussisimasoq.

Angutinnguaq Schmidtili aalajangiusimaannarpoq.

- Kalaallit Nunaanni innuttaasut nammineerlutik kiffaanngissuseqarlutillu inuttut aalajangiisinnaasariaqarput inunnut allanut innarliinngitsumik. Taamaammat Atassutip inuusuttaasa kommunalbestyrelsip siunnersuutini nalilersoqqissagaa kaammattuutigaat.

Borgmesteri aamma aalajnagiusimavoq. Aalajangiinerullugu uterteqqinnissaa 'naaggaavoq'. Tasssuma inerteqquteqarnissaq aalajangiilluarnerusoq tusagassiuutinut nalunaarummini erseqqissaatigaa.

- Tamannami inuunermi ajoqutiginatigu iluaqutigiinnartussaavarput, taanna allappoq, Sermitsiamullu itisiliivoq.

- Uggorivara Qeqqata Kommuniani pujortaqqusinnginnerup oqallisaanera illuinnaasiorpallaarnera. Allaanngilagut inuup inuuneranik ajortorujussuarmik sunniuteqartummik aalajangiisimasugut, naak inuiaqatigiit peqqinnerulernissaannik siunertaqaraluartugut, taanna aviisimut oqarpoq.