Nuna tamakkerlugu sungiusaasoq: Unammisartut sungiusarluarsimanerusariaqarput
Morten Rutkjær Nunatsinni illoqarfinni arlalinni augustimi tikeraarnermini arsaattartorpassuarnik isiginnaarpoq. Sungiusaasut aamma oqaloqatigineqarput. Allattaavini qimerloorlugit isumaliutigisassat maanna misissuataarpai.
- Isumaqarpunga arsaattartut pikkorissuseqarluartut pingaartumik GM-rtoqarsimannginnera eqqarsaatigalugu. Ivigaasaaqqanik arsaaffiit pitsaalluinnarput aammalu silami arsaannissamut atugassarititaasut ajunngeqalutik, Morten Rutkjær KNR-mut oqarpoq.
AAMMA ATUARUK KAK får ny landstræner til fodboldlandsholdet
Arsaattartulli timimikkut sungiusarsimassusaat eqqarsaatigalugu uparuagassaqarpoq.
Sakkortunerusumik sungiusassapput
- Unneqqarissaguma isumaqarpunga naammaginanngitsoq. Kalaallit arsaattarnerat sunniuteqarfigerusuppara tassanilu nunanut allanut unammisartut timikkut sungiusarsimassusaat siuarsaaffigerusullugu, Morten Rutkjær oqarpoq.
- GM-ip taamaatiinnarneqarnera pissutigalugu arsaattartut siunnerfissaaleqisimapput. Nunanut allanut unammisartunik sullissisut allat peqatigalugit suliassaraara nunanut allanut unammisartut atugaasa sukaternissaat pitsaanerusumik sakkortunerusumillu sungiusartalernissaat siunertaralugu, Morten Rutkjær oqarpoq.
AAMMA ATUARUK Qanoq pisoqarnissaanik ataatsimiinneq: Island Gamesip 2021-mi taamaatiinnarsinnaanera isumaliutaavoq
Inuppassuit arsaattartunut kalaallinut attuumassuteqartut attaveqarfigineqarput. Aamma kalaallit Nunarput qimallugu najugaqarallartut peqatigiiffii sungiusaasuilu attaveqarfigineqarput.
- Toqqarallakkat amerlasuut oktoberimi toqqassavakka taakkuussappullu nunanut allanut unammisartuunissamut piukkunnassusillit. Kingusinnerusukkut 20-22-nut taakku ikilisinneqarumaarput, Morten Rutkjær naggasiivoq.
