Assammik arsaattartut timersoqatigiiffiat: TAAK tatigiunnaarparput

Timersoqatigiit Assammik Arsartartut Kattuffiat aningaasaataaruppoq ataatsimeersuartoqarnissaalu qaquguugaluarnersumut kinguartinneqarpoq. Nutaamik siulittaasoqalernissaq siulersuisoqalernissarlu Maniitsumi assammik arsaattartut timersoqatigiiffiata maanna piumasaraa.

Allattoq Camilla Egeborg Møller

aggustip 23-at 2024 15:55

Timersoqatigiiffik Kâgssagssuk Maniitsoq 1937's håndboldafdeling erklærer mistillid til ledelsen af håndboldforbundet.

Timersoqatigiit Assammik Arsartartut Kattuffianni, TAAK-mi, aqutsisut timersoqatigiiffik Kâgssagssuk Maniitsoq 1937-mi assammik arsaattartut immikkoortortaqarfiata tatigiunnaarpai.

Kattuffiup aningaasaataarunnerata kingunerisaanik assammik arsaallutik nunanut allanut unammisartut ukiup sinnerani sungiusarsinnaajunnaarnerat ilaatigut uparuarlugu timersoqatigiiffik tusagassiorfinnut nalunaaruteqarpoq.

Soorlu aningaasartuutit akilersinnaaniarlugit pimoorussilluinnarluni aningaasaliisussarsiortoqarnerusimasuuppat taamaanga killittoqarsimanavianngikkaluartoq, assammik arsaattartut timersoqatigiiffiat isumaqarpoq.

Aamma atuarukU18 nunarsuarmi pissartanngorniuunnermi, nivissat naggammik Kalaallit Nunaat sinnerlugu unammineranni ajorsarput.

Kattuffiup aningaasarliorneranik tusagassiuutitigut paasisaqartarnertik ”akuersaarnanngilluinnavimmat” Maniitsumi Timersoqatigiiffik Kâgssagssuk aamma uparuaavoq.

Ataatsimeersuarnissamik kinguartitsineq aaqqiagiinngisitsisoq

Nuka Ole Berthelsen Timersoqatigiiffik Kâgssagssuk Maniitsumi assammik arsarnermik immikkoortortaqarfiani siulittaasuuvoq, taassumalu assammik arsaattartut kattuffianni aqutseriaaseq akuersaaginnarsinnaajunnaarpaa.

- Timersoqatigiiffipput isumaqarpoq TAAK-mi massakkut ulluinnarni aqunneqarnermigut eqqunngitsumik malittarisassatsinnik uniuisut aamma aningaasaqarnermik aqutsineq eqqunngitsumik aqunneqartoq. TAAK-p ataatsimeersuarfissaralua juunip 15-iat nallertinnagu naammassereertussaq suli maannamut naammassineqarsimanngilaq, taanna KNR-imut oqarpoq.

Ataatsimeersuarnermik kinguartitsineq kattuffimmut ilaatigut tatiginarunnaarsitseqataasoq Maniitsumi timersoqatigiiffimmi siulittaasoq uparuaavoq. Aningaasanut naatsorsuutit immikkut ataatsimeersuarnissamut atorneqarsimasariaqaraluartut suliassallu allat qaammatialuit matuma siornali naammassereersinnaagaluartut, Nuka Ole Berthelsen oqarpoq:

SULIAQ NAATSUMIK

Assammik arsartartut kattuffiata ilaatigut aningaasaqarnerminik aqutsinini ataatsimeersuarnissamillu qaquguugaluarnersumut kinguartitsinini kingullertigut isornartorsiorneqaatigai.

Assammik arsartartut kattuffiat nalinginnaanerusumik ingerlaqqilissaguni aappagu million koruunit tungaanut sipaarniuteqartariaqarneq siulittaasup Carsten Olsenip oqaatigereerpaa.

TAAK ukiumut 850.000 koruuninik pisortanit taperneqartarpoq.

Nunatsinni timersortartut pikkorivissut – aamma assammik arsaattartut, aningaasaliivigineqarnerusarnissaannik partiit Naleraq aamma Siumut siusinnerusukkut kissaateqarlutik oqaaseqarput.

- Siulersuisut sulilluaraangata anguniagaqarluarlutillu pimoorussigaangata suliassat suliassaareersut naammassereersimasussaagaluarput. Kisianni uani takussutissaavoq arlaatigut susoqarsimammat suliassat pingaarutilerujussuit suliarineqarsimannginnerat.

Siulittaasoq siulersuisullu nutaat piumasarineqartut

Assammik arsaattartut timersoqatigiiffii allat arlallit, ilaatigut Nuummiit GSS, isornartorsiuinermik tapersiisut Nuka Ole Berthelsen oqarpoq. Nunatsinnilu timersoqatigiiffiit allat kattuffimmi aqutseriaaseq pillugu qisuariaateqassamaartut, taanna aamma oqarpoq.

- Aallartitat piaartumik ataatsimeersuartinneqartariaqartut aamma siulittaasup siulersuisullu tunuarnerminnik nalunaaruteqartariaqartut, kiisalu siulersuisunik nutaanik qinersisoqartariaqarnera minnerpamik piumasarissavarput, Nuka Ole Berthelsen oqarpoq.

Aamma atuaruk Aningaasaataaruttut: Assammik arsarlutik nunanut allanut unammisartut ukiup sinnerani katersuuteqqissanngitsut

Arnat assamik arsaallutik nunanut allanut unammisartut nunarsuarmi pissartanngorniunnissamut anngunniunnerat anngunnerallu 2023-mi aningaasartuutaangaatsiarnerat akissaarunnermut pissutaasoq kattuffiup siulittaasua, Carsten Olsen, KNR-imut siusinnerukkut oqarpoq.

Assammik arsaattartut kattuffiata aningaasartuutiminik pingaarnersiuinera isornartorsiorlugu Naleqqamit inatsisartuni ilaasortaq, Hans Enoksen, juulimi oqaaseqarpoq.

Nivissat U18-it Kinami VM-eqataareersullu nunatta assammik arsaalluni nunanut allanut unammisartui ukiup sinnerani sungiusaqatigiissinnaajunnaarput.

Nuka Ole Berthelsenimit Timersoqatigiiffik Kâgssagssummiillu isornartorsiuineq pillugu KNR-ip TAAK attavigaa, taakkuli oqaaseqarusunngillat

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.