Kalaallit inuusuttut nunanut allanut unammisartut nunanut tamalaanut unammilersut
Kalaallit assammik arsartartut nunani tamalaani unammisaleqqittarput assammik arsartartut kattuffiat TAAK aningaasaqarniarnikkut ajornartorsiorujussuareersoq.
Tamanna U-19-ni arnani nunanut allanut unammisartut iluaqutilerpaat. Taakku IHF-Trophy pillugu unamminissanut annguniuteqataalerput. Tassani nunarsuarmi nunavittaneersut assigiinngitsut IHF-Trophymi unamminissamut anngunniuttarput.
Amerikap avannaamiut Caribiamiullu unamminissaannut kalaallit peqataaffigisassaannut iligiit qulingiluat nalunaarput unamminerillu Canadami illoqarfimmi Drummondvillemi julip 16-aniit pissapput.
- Piffissami tassani unammineq sungiusimanngilarput. Taamaattoq unammisartutta amerlanerit tamanna misigereerpiaat aasaanerani sulinngiffeqartoqarnerani VM-qataanikuugamik, U-19-ni nuna tamakkerlugu sungiusaasoq Victoria Budek Svendsen KNR-mut oqarpoq.
Maanna tamaviaarluni sungiusartoqarpoq unamminissani piareersimalluarnissaq siunertaralugu.
- Tusakkavut kingulliit malillugit iligiit qulingiluat nalunaarsimapput. Paasivarput Cuba aamma USA nalunaarsimasut. Taakku siornatigut unamminikuunngilagut taakkuli sakkortuunik unammisartoqarlutik sassartarput, Victoria Budek Svendsen oqarpoq.
Peqataaneq ilinniarfiussaaq
Nuna tamakkerlugu sungiusaasoq aamma assammik arsartartut kattuffiat ilimasuuteqarpallaarnaversaarput.
- TAAK-miit inuusuttut nunanut allanut unammisartut eqqarsaatigalugit kissaatigineqarpoq ilikkagaqarniarlutik peqataassasut. Aallassapput misilittagartusarniarlutik aammalu unamminerit suli amerlanerit misiginiarlugit assammik arsartutut ingerlariaqqinnissaminni atorsinnaasaminnik katersissallutik, Victoria Budek Svendsen oqarpoq.
Unammiffiusartup avataatigut unamminerit saniatigut allaassutaasoq alla tassaavoq iligiit Amerikap avannaamiut Caribiamiullu allaasumik periuseqarput.
Kalaallit unammisartut Europamiut assammik arsariaasiannut eqqaanarnerusumik periusartut atlantikup akiani nunat periutsinit naliginnaasunit allaanerusunik periuseqartarput.
- Piareersarfigaarput ilaat allaasumik periuseqarsinnaasut. Ilai immaqa sassasissumik assersuissaåpput. Allaanerusumik assammik arsartarput. Tamakku sungiusarnitsinni ilaassapput tulassimavallaanngitsumik assersuisoqarsinnaanera piareersimaffiginiarlugu, Victoria Budek Svendsen oqarpoq.
- Nunat tamakku arsartoqarsinnaapput ataatsimik isumalluutaasorujussuarmik. Tamanna aamma sungiunniagassaraarput, Victoria Budek Svendsen oqarpoq.
Unammersuarnissat sapaatip akunneranik sioqqullugit U-19-ni nunanut allanut unammisartut Canadaliassapput avangiisissatik sungiunniariartorlugit. Angalanerminni Nuummii New Yorkimut timmisartuussivik nutaaq aqqutigeriarlugu unammiffissamut Drummondvillemut illoqarfissuup Montrealip avataaniittumut ingerlaqqissapput.
