Demokraatit sikaritsit ’akitsungaatsiarnissaannik’ siunnersuuteqartut
Inuit pujortarunnaassagunik aningaasatigut eqqorneqartariaqarput.
Demokraatit sikaritsit akiinut ’qaffaangaatsiarusuttut’ taama isumaqarput. Qanoq akitsuisoqarnissaa aalajangersimasumik aalajanginngilaat, iluminnili sikaritsit poortat 100 koruunit tikillugit akeqalernissaat qaqinnikuuaat.
Demokraatinit Inatsisartunut ilaasortaq, Justus Hansen taama oqarpoq.
Taanna pujortartartut amerlassusaat qanoq ikilisinneqarsinnaanerannut apeqquteqaateqartuuvoq. Politikerit februaarimi ukiukkut ataatsimiinnissamut katersuuppata tamanna oqallisigineqassaaq.
- Inuussuttut pujortartalernissaannut pinaveersaartitsineruvoq. Inuusuttut sikaritsersinissaannut ajornarnerulaalersitsissaaq, Justus Hansen oqarpoq.
- Inuusuttut pujortartalernissaannut ersititsissaaq.
AAMMA ATUARUK Nioqqutissat peqqinnanngitsut akitsuusiiffigineqarnerat pisisartunut tunuarsimaartitsinngitsut
Innuttaasut affaasa missaat sinnerlugit ullut tamaasa pujortartartut, innuttaasunik misissuinerup kingulliup 2018-imeersup takutippaa.
Cigaritsit akii 82 koruunimit 86,50 koruunimut 2019-imi qaffanneqarput. Tassanngali cigaretsinik ikinnerusunik tunisaqartoqartalinngilaq, Justus Hansenilli oqarnera naapertorlugu qaammarsaanermut tunngavoq.
* 2018-imi 52 procentit ullut tamaasa pujortartarput
* 2014-imi 57 procentit ullut tamaasa pujortartarput
* 1993-imi 68 procentit ullut tamaasa pujortartarput
Paasissutissarsiffik: Kalaallit Nunaanni Inuiaqatigiinni misissuineq, 2018
Pujortarunnaarsitsinissamut akit sakkugineqartut
Demokraatit oqarnerat naapertorlugu pujortartartut ikilissapput, maannakkutulli itsillugu ikiliartornerat arriippallaarpoq.
Tamannalu iluatsinniaruni akit atornissaat sakkussaalluarpoq. Aamma naak akisungaatsiareeraluartut, Justus Hansen oqallisaarummini allappoq.
Tupanut akitsuutinik qaffaanikkuusinnaanera assersuutaasoq, oqallisaarummi allassimavoq.
AAMMA ATUARUK Siulittaasoq peqqissuseq pillugu: Sukkunut, aalakoornartunut cigarettinullu akitsuutit kisimik naammanngillat
Akitsuutit isumaqatiginagit oqaatiginikuuatit. Kingullermik naalakkersuisoqatigiinnut ilanngutilerassi Nivi Olsenip corona pillugu iluangersuasoqarnera akitsuusiinikkut aningaasalerneqassanngitsoq oqaatigaa. Akitsuusiiniarneq politikikkut nutaamik sammiveqalernerua?
- Akitsuutit 100 procentimik atorneqassanngilaq. Peqqinnerulersitsissappalli aamma peqqinnissamik susassaqarfimmut sipaaruteqalaarsitsisinnaappat soorunami misissorusupparput.
- Kisianni una oqallisaarutaavoq, taanna partiit allat ilaasussaapput, taamaammat soorunami sikaritsinik tunisakinnerulernissamut qanoq iliorsinnaanerluta soorunami takujumaarparput, Justus Hansen oqarpoq.
E-sikaritsit, sunoorsit qaammarsaanerlu
Sikaritsit akiinut qaffaanerup saniatigut Demokraatit oqarnerat naapertorlugu innuttaasut nikotinitaqanngitsunik soorlu e-sikaritsinik sunoorsinillu pisisinnaanissaat ajornaannerusariaqarpoq. Peqqinnarnerat apeqqutaatinnagu kisianni sikaritsitulli peqqinnanngitsiginngimmata.
Aamma inuusuttut pujortartarnerup qanoq ulorianartiginerat pujortarunnaarnissamullu pikkorissarnernik qaammarsaaviginiarneqarnerussapput.
AAMMA ATUARUK Wangenheim: Nioqqutissat peqqinnanngitsut akitsuutaannik qaffaanerup sunniutaanik naliliinissaq siusippallaarpoq
- Iluanaarutit akitsuutilluunniit qaffaassutaat pujortarunnaarnissamut pikkorissaanernut imaluunniit pujortartartut ikilisinnissaannut assingusunut naleqquttumik atorneqarsinnaapput, Justus Hansen oqarpoq.
Inatsisartuni februaarip ulluisa 23-anni tamanna pillugu oqallittoqassaaq.