Løkkep assani Nunatsinnut - aammaarluni - isaappaa
Folketingini apeqqarissaartoqarnerani tamanna aammaarluni uppernarsaqqippaa.
- Naalakkersuisut siulittaasuanut kalaallit tusagassiorfiini toqqaannartumik Folketingimilu ataatsimiittarfimmi maani oqallinnerni qassiini nalunaarutiginikuuara Kalaallit Nunaanni arlaat – tassalu kalaallit Naalakkersuisui, danskit naalakkersuisuisa suleqatigisaat - Kalaallit Nunaata unammillernartitaasa ilaannut pilersaarusiornissamut qaninnerusumik suleqatiginnikkusuppat (...) taava uanga piareersimavunga, Lars Løkke Rasmussen oqarpoq.
AAMMA ATUARUK Naalagaaffeqatigiineq pillugu nutaamik isumaqatigiissusiortoqarli
Ministeriunerlu taamaalilluni naalakkersuisooqatigiilersunut nutaanut qaninnerusumik suleqatigiinnissamut kajumissaarivoq.
Aaja Chemnitz Larsenip danskit naalakkersuisuisa naalagaaffeqatigiinnermi qanoq iliornikkut kinguneqarnerusussamik siunissami suleqatigiinnissamik isiginninnerannik apeqquteqarneranni Løkke taama oqaaseqarpoq.
AAMMA ATUARUK Namminersulivinnissap oqallisigineqarnerata pingaarutillit ukkanneqanngitsoortippai
Ministeriunerup naalagaaffeqatigiinnermi immikkoortuni tamarmi arlalinnik pitsanngorsarneqarsinnaasoqartoq nassuerutigaa. Pitsanngorsaavigineqarsinnaasorpassuilli ilaannut piumasaqaataavoq Kalaallit Nunaata danskit naalakkersuisuisa ikiuukkusullutik neqerooruteqarnerannik akuersaarnissaa.
- Kisianni namminiilivikkusussuseq namminersornerlu pillugu inatsit ataqqitillugit pinngitsaaliillunga iliuuseqarsinnaanngilanga, taamaammat kalaallit naalakkersuisui danskit naalakkersuisuinut oqaloqatigiinnikkumanissaat pisariaqarpoq, ministeriuneq oqarpoq.
AAMMA ATUARUK Naalagaaffiit namminersortut suleqatigiit pilersinneqarsinnaapput