Kuultinnannikuunermiit kuultisiornermut: Jens Frederik Nielsen aatsitassanut naalakkersuisunngortoq
29-nik ukiulik, Jens Frederik Nielsen Nuummeersoq Kim Kielsenip naalakkersuisuinut ullumi iserpoq.
Taassumali ukiukinnera iluaqutaaginnartoq, inuussutissarsiornermut aatsitassaqarnermullu naalakkersuisunngorlaaq isumaqarpoq:
- Akisussaaffimmik tigusinissannut piareersimajuarnikuuvunga. Aamma qunuginikuunngisaannarpara sulerigaluarumaluunniit akisussaaffimmik tigusinissara. Timersornerup silarsuaani akisussaaffimmik tigusisarpunga assersuutigiinnarlugu annertuumik. Taamammat inuttut uanga kinaassusinniippoq, Jens Frederik Nielsen oqarpoq.
AAMMA ATUARUK Ataatsimut isigalugu: Naalakkersuisut nutaat aaku
Taanna timersortartutut sulorarnermik isikkammillu arsarnermik nuannarisaqartutut ulluinnarni ilisimaneqarnerunnguatsiarpoq.
Taassuma B-67-imi sapaatip-akunnikkaartumik sulorartarpoq, siornalu nunatsinni pissartanngorluni.
Maannali sulorarnermiit unamminermiit annerusumik akisussaaffeqartussanngorpoq.
- Tassa soorunami pissanngavunga, kisianni aamma qilanaarpunga. Akisussaaffik annertooq tigulerpara. Eqqumiilaarpoq misigissusikkut kisianni piareersimavunga, qilanaarpunga.
Coronap ajornartorsiortitsinera inuussutissaqarnermut unammillernartoqartitsisoq
Jens Frederik Nielsen Demokraatini ukiuni qassiiusuni politikkikkut suliaqarsimavoq. Aallaqqaammut Randi Vestergaard Evaldsenimut Nivi Olsenimullu allattaavoq, kingornalu Demokraatit partiianut siunnersortinngorluni.
Maannalu inuussutissarsiornermut aatsitassaqarnermullu naalakkersuisunngorpoq. Atuuffiit taakku annertupput. Coronammi ajornartorsiortitsinera nunatsinnut unammillernartoqartitsisoq, inuussutissarsiortullu qassiiusut tamanna pissutigalugu isertitassaaleqipput. Tamannalu Jens Frederik Nielsenip politikkikkut akisussaaffigilerpaa.
Taassuma Vittus Qujaukitsup Kim Kielsenillu aatsitassarsiornissamut pilersaarusiaanik – tassa nunatta aatsitassarsiortunut uuliasiortunullu soqutiginartunngorsarnissaanik pilersaarummik nangitsinissani naatsorsuutigaa.
AAMMA ATUARUK Naalakkersuisooqatigiit isumaqatigiissutaat nutaaq: Naalakkersuisut uku sulissutiginiarpaat
- Ilumoorpoq akisussaaffiit angisuut tigulerpakka. Pingaarnertut immaqa maannakkut eqqaassavara inuussutissarsiornermut ikiorsiissutit uanga atinniittussaagamik, tassani Covid-19 peqqutigalugu suliassat annertuut tikilerpaatigut, tassani suleqataanissarput soorunami aamma qilanaarutigaarput aamma suliffeqarfiit namminersortullu uummateqarfigiuarnikuugatsigit politikkitsinni taanna aamma erseqqarippoq, taanna oqarpoq.
- Saniatigut aatsitassarsiornermut tunngatillugu suliat maannakkut ingerlanneqartut aamma ingerlatissavakka, kisianni pingaartut oqaatigerusuppara eqaallisaanissaq aatsitassarsiornerup iluani nunattalu pilerisarnissaa taanna assut aallutissallugu, Jens Frederik Nielsen oqarpoq.
