Naalakkersuisooqatigiit isumaqatigiissutaat nutaaq: Naalakkersuisut uku sulissutiginiarpaat

Coronap ajornartorsiortitsinera, ileqqaarneq aatsitassaniillu isertitat, Naalakkersuisooqatigiit tassa Siumut, Demokraatit Nunatta Qitornaasalu isumaqatigiissutaanni nutaami sulissutigisassatut erseqqissarneqarput.
Vittus Qujaukitsoq, Kim Kielsen aamam Nivi Olsen isumaqatigiissummik atsiortut. Assi © : KNR
Allattoq Christine Hyldal
maajip 29-at 2020 14:37
Nutserisoq Connie Fontain

Partii ikorfartortaasoq Demokraatit naalakkersuisooqatigiinni Siumut Nunatta Qitornaanilu ilaalerput. Demokraatit taamaalillutik Namminersorlutik Oqartussat allaffeqarfiannut 2018-imi qimataminnut uteqqittussanngorput.

Demokraatit siulittaasorigallagaata oqarnera naapertorlugu Naalakkersuisunut taamaallaat ikorfartortaanissaq naammakkunnaarpoq. Coronammi ajornartorsiortitsinerani ”politikkikkut patajaatsumik, periataarsinnaassusilimmik aalajangiisinnaassuseqartumillu nunatta siulersorneqarnissaa” pisariaqartoq, naalakkersuisooqatigiinnissamut isumaqatigiissummi allassimavoq.

”Kalaallit peqqissuunissaat, ingammik nualluussuup COVID-19-ip ajornartoorfigineqarnerata nalaani, qulakkeerniarlugu sulisoqartariaqarpoq, taamaattumik partiit naalakkersuisooqatigiilersut pisariaqartutut nalilerpaat pisussaaffiliinerusumik naalakkersuisuni suleqatigiilernissaq”, isumaqatigiissummi allassimavoq.

AAMMA ATUARUK Kielsenip naalakkersuisooqatigiivi nutaat: Demokraatit naalakkersuisooqataalersut

Peqqinnissarlu siulliit ilaanni eqqaaneqarpoq. Isumalluutit pisariaqartinneqartut nunatta peqqinnissaqarfianiissasut, naalakkersuisooqatigiit isumaqatigiissutaanni ” Siuariartorneq, patajaassuseq toqqisisimanerlu”-mik qulequtserneqarsimasumi neriorsuutigineqarpoq.

- Nakorsiat isumannaallisarneqarnerat aammalu nalinginnaasumik peqqissuunissarput qulakkeerneqartariaqarpoq, isumaqatigiissummi allassimavoq.

Aningaasaqarnikkulli ineriartortitsineq siullertut pineqanngilaq. Sipaarniartoqarsinnaavoq – isumaqatigiissummi naapertorlugu coronap ajornartorsiortitsinera pissutigalugu ”aningaasaqarnikkut ineriartortitsiniarnermi anguniakkat eqquutsinniarnerat ajornakusuulissaaq”. 

AAMMA ATUARUK Ataatsimut isigalugu: Naalakkersuisut nutaat aaku

Assersuutigalugu takornariaqarnermik suliaqartut coronap ajornartorsiortitsineranik ilungersuuteqartut ikiorneqarnissamut periarfissaqassapput.

Isumaqatigiissut naapertorlugu naalakkersuisooqatigiit nassuerutigaat:

- Aningaasatigut sinaakkutissat nalimmassarneqarnissaat pisariaqartutut isigivineqarput, taamaattumik killiffimmut ilungersunartumut naapertuuttunngorsaalluni aningaasaliissutit iluarsineqarnissaat pisariaqarpoq.

Pisortat allafffissornerat annikinnerpaaffissamiitsinneqassaaq.

Partiit naalakkersuisooqatigiit sulissutiginiarpaat:

  • Atuarfeqarnikkut ilinniartitaanikkullu aaqqissuusseqqinneq
  • Kulturikkut inuussutissarsiuteqarnerup
  • Aalisarnermut inatsisip nutarternissaa
  • Piniarnermut inatsisip nutarternissaa
  • Illoqarfinni nunaqarfinnilu tunitsiviit piorsarnissaat
  • Sulisoqarnikkut inatsisip nutarterneqarnissaa
  • Nunatta Danmarkillu akornani aningaasat ingerlaarfii pillugit misissuineq
  • Naalagaaffimmiit oqartussaaffiit tiguneqarnissaat pillugu piareersarneq
  • Tunngaviusumik inatsisissaq pillugu sulinerup nanginnissaa
  • Peqqinnissaq pillugu isumasioqatigiissitat peqqinnissaqarfiup qanoq siunissami aaqqiissuunneqarnissaa pillugu nangitsillunilu isumaliutissiissuteqassaaq.
  • Avatangiisit pillugit aningaasaateqarfimmik pilersitsinissaq

Tamatuma saniatigut ”Nunatta Karsiata isertitai inuussutissarsiutinit amerlanerusunit aallaaveqarnissaat pisariaqarluinnarpoq. Aatsitassarsiorneq sukarsuartut inerisarneqassaaq”.

Aatsitassanik misissuinermi ingerlatat annertusarneqassapput piiaanissamullu akuersissutinik amerlanerusunik tunniussisoqassasoq, isumaqatigiissummi allassimavoq.

Partiit naalakkersuisooqatigiittut Nunatta nunanut allanut, illersornissamut sillimaniarnikkullu politikkimut tunngasuni sunniuteqarnerulernissaa sulissutiginiarpaat.

Naalakkersuisooqatigiit sulissutigineqareersut ingerlatiinnassavaat:

  • Inatsisartut 2020-mut aningaasanut inatsisaat
  • Suliffissaaleqinerup akiorneqarnera
  • Ilaqutariit meerartallit atugaasa pitsanngorsarneqarnissaat
  • Suliffeqarnermut ilanngaat
  • Piginneqatigiiffinnut akileraarutip appartinneqarnera
  • Ilanngaassivik
  • Mittarfiliortiternerit
  • Erngup nukinganik nukiliorfiit nutaat sanaartornissaannut pilersaarutit attanneqassapput, coronalli ajornartorsiortitsinera pissutigalugu naleqqussaasoqarsinnaanissaa pisariaqarsinnaalluni.