Ataatsimut isigalugu: Naalakkersuisut nutaat aaku

Naalakkersuisut nutaat pingasut Kielsenip naalakkersuisuutitaaniilernissamut piareerput. Taakku ilaat nunatsinni sulorartartut pikkorinnerpaat ilagaat.
Demokraatinit naalakkersuisooqataalersut tassaapput Anna Wangenheim aamma Steen Lynge - kiisalu ullumikkut tupaallaataasoq, Jens Frederik Nielsen, Demokraatit partiianni allattaasoq, nunatsinnilu sulorartartut pikkorinnerpaat ilagisaat Assi © : Tusagassiivik
Allattoq Christine Hyldal
maajip 29-at 2020 11:58
Nutserisoq Connie Fontain

Demokraatit Siumut Partii Nalerarlu naalakkersuisooqatigilerpaat.

Naalakkersuisooqatigiit allanngornernerat pissutigalugu naalakkersuisut aamma allanngussapput – naalakkersuisullu nutaat pingasut innersuussutigineqarput.

Inuit nutaat pingasut Naalakkersuisunngortinneqassanersut Inatsisartut ullumi kingusinnerusukkut taasissutigissavaat.

Taakku pingasut nutaat tassaapput Anna Wangenheim aamma Steen Lynge – kiisalu ullumikkut tupaallaataasoq Jens Frederik Nielsen, Demokraatit partiianni allattaasoq, nunatsinnilu sulorartartut pikkorinnerpaat ilagisaat.

Namminersorlutik Oqartussani naalakkersuisoqarfiit qulingiluaapput – naalakkersuisullu ullumikkumut qulingiluaannaasimapput. Tamanna maanna allanngussaaq – naalakkersuisullu qulit allaffimmi inissaqalissapput.

Naalakkersuisooreersut naalakkersuisuuginnassapput

Naalakkersuisut arfineq-marluk atuuttut ingerlaqqissapput. 

  • Kim Kielsen (S) siulittaasup Naalakkersuisoqarfiani ingerlaannassaaq.
  • Vittus Qujaukitsoq (NQ) aningaasaqarnermut naalakkersuisuuginnassaaq. Taassuma ullumikkumut aatsitassaqarnermut aamma akisussaaffigigaluarpaa – aatsitassanulli naalakkersuisoqarfik uunga ingerlaqqissaaq 
  • Jens Frederik Nielsen, taanna inuussutissarsiornermut aatsitassaqarnermullu naalakkersuisunngussaaq. 
  • Karl Frederik Danielsen (S) ineqarnermut attaveqaqatigiinnermullu naalakkersuisuuginnassaaq.
  • Ane Lone Bagger (S) ilinniartitaanermut, kultureqarnermut ilageeqarnermullu naalakkersuisuuginnassaaq. Taassuma nunanut allanut tunngasunut naalakkersuisoqarfik aamma akisussaaffigigaluarpaa, atuuffilli taanna uannga naalakkersuisuuffigineqalissaaq 
  • Steen Lynge Demokraatineersoq nunanut allanut tunngasunut nukissiuuteqarnermullu naalakkersuisunngussaaq.
  • Jens Immanuelsen (S) aalisarnermut, piniarnermut nunalerinermullu naalakkersuisuuginnassaaq. 
  • Martha Abelsen (S) isumaginninnermut inatsiseqarnermullu naalakkersuisuuginnassaaq. Taassuma peqqissutsimut naalakkersuisoqarfik ullumikkumut akisussaaffigigaluarpaa – taanna uannga naalakkersuisuuffigineqalissalluni
  • Demokraatinit Anna Wangenheim, taanna peqqissutsimut naalakkersuisuussaaq.
  • Jess Svane (S) suliffeqarnermullu ilisimatusarnermut avatangiisinullu naalakkersuisuuginnassaaq.