Kuulti nunatsinneersoq tunisassiareqqinneqalerpoq

Kuultisiorfik Napasorsuup qooruani Nanortallup eqqaaniittoq maajip kingorna kuulti issoqqarissuliat marluk tunisassiarineqareersimapput, Schweizimut akuiarneqartussanngorlugit nassiunneqartarput. Issoqqarissut 1,2 kilonik oqimaatsigipput 90 procentimillu kuultimik akoqarlutik, kuultilli akimanermik taaneqartartunik tunisassiorniaraanni issoqqarissut 99,9 procentimik kuultimik akoqassapput.

juulip 15-at 2011 10:20

Nunarput kuultimik tunisassioqqilerpoq, Sermitsiaq allappoq.

Sermitsiamit apersorneqartup oqarnera naapertorlugu, Angel Miningip tuluit nunaanneersup pisortaata Nicholas Hallip ilimagaa, kuultisiorfimmi kuulti issoqqarissoq ataaseq sapaatip akunneranut naammassisarumaaraa, issoqqarissullu qaammatit tamaasa ataatsimoortillugit Schweizimut nassiunneqartassasut.

- Tunisassiorneq ingerlallualerpat neriuutigaarput 2.000 ouncenik - imaluunniit 56,7 kilomik kuultimik - qaammammut tunisassiortalerumaartugut. Kuultillu akia maannakkorpiaq qaffasimmat tunisassiorneq neriunaateqarluarpoq, Nicholas Hall Sermitsiamut oqarpoq.

Kuultisiorfimmik piginnittuusimasup - Crew Gold Corporationip - tunisassiornertik 2008-mi unitsippaat.

Kuulti akoqarpallaarmat akiminut naleqqussimanngimmat. Imminut akilersinnaasumik kuultisiorniarnermi pingaartut ilagaat kuulti nunatsinni suliarineqarsinnaanera.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.