Kulturinit assigiinngisitaartunit nerisaassiornermut atuakkiaq nersornaatinut arlalinnut innersuunneqartoq

Nerisassiornermut ilitsersuut soorlu saattuanik suppiliaq kalaallit saattuaataannik sanaaq umimmaat neqaannik nerisassat miseqqikkat amerikamiullu nerisassaat ilisimaneqarluartut naatsiiat sequtsikkat kulturinit assigiinngitsunit nerisassiornermut atuakkiami nutaami sanileriiaapput.

Nerisassiornermut ilitsersuutit saniatigut kulturit marluk oqaluttuassartaat atuakkami aamma atuarneqarsinnaapput. Assi © : Billeder fra kogebogen 'En smag af to verdener'.

Nerisassiornermut atuakkiap nammineq igaffinni nerisassat iganissaannut periarfissippaatit, taannalu massakkut Gourmand World Cookbook Awardsimit nersornaatinut tallimanut innersuunneqarsimalluni. Nersornaasiisarneq nunarsuaq tamakkerlugu unammineruvoq, nunarsuaq tamakkerlugu mamartulianik saqqummersitanik nerisassiornermilu eqqumiitsuliornernik nersorinnittoq.

Taama Pinngortitaleriffik atuakkioqataasimasoq tusagassiorfinnut nalunaarummi allappoq.

Nerisassiornermut atuakkiami kulturini taakkunani marlunni ileqquusumik massakkullu nerisassat sammineqarput, assigiinngisitaartunillu kulturinit nerisassiornermut atuakkiaq Inuili – Food College Greenlandimi aamma University of Southern Maine-imi ilinniartut kalaallit amerikamiullu akornanni suleqatigiilluarnikkut aamma pilersinneqarsimalluni.

Mamassutsip angakkuakkatullusooq tupinnartortaanut nersorinninneq

Nerisassiornermut ilitsersuutit piviusut saniatigut atuagaq nunani taakkunani marlunni mamartuliornermik oqaluttuarisaanermik imaqarpoq. Tamanna Pinngortitaleriffimmit taaneqartutut ’mamassutsip angakkuakkatullusooq tupinnartortaanut aammalu nerisassioriaatsimi sorlarisanut nersorinninneruvoq’.

Innersuunneqarnerit iluatsitsilluarnerupput, kisianni Inuili - Food College Greenlandimi ilinniartitaanermut pisortamut, Jacob Hansenimut, atuakkap pilersinniarlugu ingerlasimaneq angeqqataanik iluatsitsinerusimavoq.

- Ilinniartut akornanni naapinneq nerisassiornermut atuakkiami naammassisami nerisassat angeqqataanik iluatsitsinerusimapput.

- Kulturit akornanni naapinneq suliamut tunngasutut ilikkagaqarnermik isumassarsinermillu tunisiinnarsimanngilaq, aammali ilinniartut ataasiakkaat attaveqarfiinik annertusaasimalluni, oqarpoq.

Nerisassiornermut atuagaq kategoriini tulliuttuni pitsaanerpaatut nersornaaserneqarnissamut innersuunneqarpoq:

• Nerisassiornermik ilinniarfik,
• Nerisassiornermik atuagassiatut naqitaq,
• Ilisimatusarfimmit naqitaq,
• Nunat Avannarlermiut
• Issittormiut. 

'Inuiaat Marluk Mamartuliaat' nersornaaserneqassanersoq 29-ssaanik nersornaasiilluni aaqqissuussinermi Saudi Arabiami ulluni 27.-29. novembarimi ingerlanneqartussami paasinarsissaaq.