Saarullik naleerukkiartortoq: Aalisartut akueriumanngilaat

Nutartitagaq: Royal Greenlandimiit akissuteqaat ilannguppoq.

Sinerissap qanittuani aalisartut pissutsit akueriumajunnaarpaat inooqataaffigisinnaajunnaarlugilluunniit. 

Taama aalisartut piniartullu kattuffiat KNAPK tusagassiorfinnut nalunaarummi oqariartuuteqarpoq.  

Oqaaseqaat aninneqarpoq KNAPK-mit oqaatigineqartoq naapertorlugu Namminersorlutik Oqartussanit pigineqartoq Royal Greenland namminersortunillu pigineqartoq Polar Seafood saarullinnik tunisinermut akigititanik appaareersullu.

Eqqorporlu: Royal Greenland aalisartunut saarullinnik niaquikkanik kiilumut 10,75 koruuninik akiliisarsimagaluarpoq. Suliffeqarfik 9. oktobari aallarnerfigalugu taamaallaat 8,25 koruuneertarsimavoq, imaappoq akigititaa 23 procentimik appariaateqarsimalluni.

Tamanna Royal Greenland Nuup Facebookimi quppernerani allaqqavoq.   

Akerliussutsimik takutitsinissamik nalunaaruteqartut

Tamannalu aalisarnermik suliniaqatigiiffinnit arlalinnit sakkortuumik isornartorsiorneqarpoq.

- Naammagittarsinnaanerput nunguppoq. Akuersaarneqarsinnaanngilaq aalisakkerinermik suliffeqarfissuit taakku marluk kisermaassisutut pissusilersornerat. Kisermaassilluni ingerlatsinermi inissisimaffimmik tamanna atornerluineruvoq. Sinerissap qanittuani aalisartut ukiuni qulikkaani arlalinni suliffeqarfinnut taakkununnga kisermaassisunut pilliuteqartareerput, KNAPK-mi siulittaasoq Nikkulaat Jeremiassen tusagassiorfinnut nalunaarummi oqarpoq.

Oqaaseqaataa Nuummi Aalisartut Piniartullu Peqatigiiffiannit NAPP-mit taperserneqarpoq.

Oqaaseq 'akuersaarneqarsinnaanngilaq' atoqqinneqarpoq, aningaasaqarnikkut pissutsit pillugit siulittaasoq Niels Eli Boassen isummermat. 

- 15. novembari aalisartut piniartullu ulloraat. Sakkortuumik qisuariartariaqarluta oqaluuseraarput, siulittaasoq Naalakkersuisunut akerliussutsimik takutitsinissamik nalunaaruteqarsimasoq erseqqissaavoq.

Aalisartut ilaqutaallu akigitinneqartut appariartornerat pissutigalugu ilungersunartorsiortut, Niels Eli Boassen ilisimatitsivoq.

Royal Greenlandimi tunisassiornermut pisortaq Lars Nielsen apersorniaraluarparput allakkatigulli ima akissuteqarpoq: 

 - Niuerfinni tamani saarulliit akii appariartortut takusinnaavarput, taamaammat tunisinermi akit niuerfinni akigitinneqartunut malinnaatittariaqarpagut, soorlu akit qaffakkaangata aamma malittarigut. Tuniniaanermi akit attatiinnarneqarsinnaasimannginnamik appariartorput, taamatuttaarlu aningaasartuutigut qaffakkiartorput.

KNR-ip Polar Seafood oqaaseqartitsiniaraluarpaa, maannamulli iluatsissimanagu.