Air Greenlandip Danmarkimut aqqutit marluk ammaqqissavai
Air Greenlandip Jyllandip qeqqanut aappaagu poorskimi aqqut ammaqqippagu Kangerlussuup Billundillu akornanni timmisartuussisalissaaq.
Aasaanerani Kangerlussuup Aalborgillu akornanni timmisartuussineq aamma ammaqqinneqassaaq.
Taama timmisartuutileqatigiiffik tusagassiorfinnut nalunaarummi allappoq.
Juunip 25-aniit qaammatini marlunni Aalborgimut timmisartorsinnaassaatit. Aqqutaali toqqaannartuunngitsoq ingerlatseqatigiiffik allappoq. København aqqusaarneqaqqaartassaaq.
- Aalborgip mittarfianit mittarfianullu marlunngornikkut Kangerlussuarmut Kangerlussuarmiillu København aqqusaarlugu timmisartuussisarnissamut periarfissaqarpugut. Taamaalilluta neriuutigaarput sullitatta Jyllandip avannaanukarnissamik kissaataat piviusunngortissinnaallugit, Henrik Søe, Air Greenlandimi aningaasarsiornermut pisortaq oqarpoq.
Billundimut toqqaannartumik
Billundip Kangerlussuullu akornanni sapaatip akunneranut timmisartuussinissaq siulleq ukioq mannamut sanilliullugu siusinerusukkut pissaaq. Aqqut taanna poorskimi, 2024-mi marsip naanerani, ammarneqariissaaq.
Jyllandimut aqqutit taakku marluk saniatigut aasaanerani Kangerlussuarmiit Københavnimut ullut tamaasa timmisartoqartassaaq. Juunip 17-ianiit septembarip 18-iata tungaanut ullut tamaasa Københavniliarsinnaassaatit.
Danmarkimut timmisartuussinerpassuit Jettime-imik suleqateqarluni suli ingerlanneqassasut, Air Greenland ilisimatitsivoq.
Nuummi ullaakkorsiorneq – Europami unnukkorsiorneq
Nuummi mittarfittaassaq 2024-ip naanerani ammarpat nutaanik periarfissaqalissaaq.
Pilersaarutigineqartutut ingerlasoqassappat Nuummi timmisartumut ikigaanni Europami illoqarfiit pingaarnersaat ulloq taanna tikinneqarsinnaalissapput.
- Nuummiit Københavnimut ullaakkut nalunaaqutaq 8.15 aallaraanni ualikkut sisamat qeqqanut Københavnimut tikittoqarsinnaassaaq. Taamaalilluni Europamut aqqutit arlaqartut angumerineqarsinnaassapput. Assersuutigalugu Parisimiittoqarsinnaavoq unnukkut arfineq marluk missaani, Henrik Søe oqarpoq.
Aqqut Kalaallit Nunaata Europap sinneranut attaveqarnerulersitsisussaq tamanut periarfissarpassuarnik killeqanngitsunik ammaassasoq pisortaq isumaqarpoq.
- Pingaarutilerujussuuvoq. Tamannaavormi Kalaallit Nunaata tikinneqarsinnaanerulerneranik nassataqartussaq. Nunarsuarlu Kalaallit Nunaannit tikikkuminarnerulerluni, oqarpoq.
Henrik Søep naatsorsuutigaa timmisartoq Nuummiit ullaakkut aallartartussaq ilaasunut 180-it missaanniittunut inissaqartassasoq.
