Sisimiut Private Boat Safari takornariaqarnermi nersornaaserneqartoq
Sisimiut Private Boat Safari Greenland Tourism Awardimit takornariaqarnermi ukioq mannamut nersornaaserneqaqqammerpoq.
Taama Air Greenland tusagassiorfinnut nalunaarummi allappoq. Jan Baneman, suliffeqarfimmik piginnittoq, eqimattanik mikinernik angalaartitsinermik neqerooruteqarluni Sisimiut eqqaannik imartaannillu ukiut 35-it sinnerlugit angalaarfigisareerlugu ilisimasaqarlualersimavoq.
Angalaartitsinerni eqqaani nunaqarfiit uumasullu takutittarpai aalisarnerlu pillugu oqaluttuarluni.
Tamannali kisiat pissutaanngilaq Sisimiut Private Boat Safarip takornariaqarnermut nersornaaserneqarluni tammajuitsumik tunineqarneranut.
Jan Banemann ilaqutaalu piujuartitsisumik ingerlatsinissamut tunniusimanerat pillugu najukkami ilisimaneqarput. Nammineq piumassutsimik suliniaqataasarput, ilaatigut nunami imaanilu eqqakkanik katersinermut, Air Greenland ilisimatitsivoq.
Greenland Tourism Award Visit Greenland Air Greenlandilu suleqatigalugit tunniunneqartarpoq.
Greenland Tourism Awardip siunertaraa takornariaqarnermik suliffeqarfiit isumannaallisaaneq, pitsaassuseq, avatangiisit, nutaaliorneq isumaginninnikkullu akisussaassuseqarneq ukkataralugit piujuartitsisumik tunisassiortut nersorlugillu saqqummersinnissaat.
Nunatsinni takornariaqarnermik suliffissuaqarnermit nersorneqarnerup saniatigut Jan Baneman tammajuitsunnappoq Air Greenlandimullu angalanissamut gavekortinnalluni 10.000 koruunit nalilimmik.
