Kujataa eriagisassat allattorsimaffiannut ilanngunneqarpoq
Nunap immikkortua 350 kvadratkilometeritut annertutigisoq, immikkuualuttunut tallimanut aggulunneqarsimasoq Tunulliarfimmut Igalikullu Kangerluanut tunngassuteqarpoq.
Nunap immikkuualuttui pineqartut tassaapput: Qassiarsuk, Igaliku, Sissarluttoq, Tasikuluulik kiisalu Qaqortukulooq-Upernaviarsuk.
UNESCO-p ukiumoortumik ataatsimeersuarnerani, Polenimi Krakowimi ukioq manna pisumi, tamanna pisortatigoortunngorpoq.
Nutaarsiassatialak nuannaarutaavoq
Nutaarsiassarlu tamanna soorunami nuannaarutigineqarpoq.
Minnerunngitsumik Kommune Kujallermi borgmesterimit Kiista P. Isaksenimit nuannaarutigineqarpoq. Taanna Krakowimi ataatsimeersuartoqarneranut peqataavoq.
- Tassami UNESCO-p allattorsimaffianiinneq, taamaalillunilu nunarsuarmiut kingornussassaannik peqartutut oqarsinnaalerneq ataqqinaataavoq annertooq atorluaraannilu kommunimut, kommunimi inuussutissarsiornermik ingerlataqartunut iluaqutissiisussaq, Kiista P. Isaksen, tusagassiuutinut nalunaarummi ilaatigut oqarpoq.
Ilinniartitaanermut, Kultureqarnermut, Ilisimatusarnermut, Ilageeqarnermullu naalakkersuisoq Doris Jakobsen Jensen aamma nuannaarpoq, Kujataatami UNESCO-p nunarsuarmi eriagassatut allattorsimaffiannut ilanngunneqarnera Ilulissat Kangerluata allattorsimaffimmut ilanngunneqarneratut iluaqutaasinnaanissaa taassuma neriuutigaa.
Danmarkip kultureqarnermut ministeriata Mette Bockip Kalaallit Nunaat pilluaqquaa, aasaaneranilu nutaarsiassatsialattut taallugu.
- Takkornariartitsinermut pingaaruteqarpoq, Kujataatalu UNESCO-p eriagasassanut allattorsimaffianut ilanngunneqarnissaanut ukiorpassuarni suliniuteqarsimasunut aamma ataqqinaataalluni, Mette Bock oqarpoq.
AAMMA ATUARUK Kujataani sumiiffiit nunarsuarmioqatigiinnut eriagisassanngortikkusukkaat
AAMMA ATUARUK Sydgrønland vil på Verdensarvslisten
AAMMA ATUARUK Issittumi sumiiffiit arlallit nunarsuarmi eriagisassanngortitassatut piukkunneqartut
AAMMA ATUARUK Nunarsuarmi kingornussatut eriagisassatut UNESCO-mut innersuussinissaq Kujataani oqallisigineqartoq
