Kuannersuit ukiuni 30-ni aatsitassarsiorfiusinnaapput

- Suliaq ukiut 20-30-it ingerlasinnaavoq immaqalu allaat sivisunerusinnaalluni. Suli nalornissutigaarput aatsitassaq qanoq annertutiginersoq, kisianni ilimanarpoq annertoorujussuarmik aatsitassaqartoq. Kisianni tassa tamaviaarluta paasiniarparput aatsitassaq qanoq annertutigisoq tassaniinnersoq, Jeremy Whybrow Kuannersuarmi suliamut akisussaasoq oqarpoq.

Taassuma neriorsuutigaa aatsitassarsiorneq qaquguungaluarnersoq unippat Kuannersuit sapinngisaq tamaat isikkuatut itsillugu qimanneqarumaartoq.

- Aatsitassarsiorfik sunaluunniit pisussaavoq pilersaaruteqassalluni aatsitassiorneq unippat periusissaminik. Aatsitassarsiorfiup sinneri matoorneqarumaarput taakkulu qaavisigut nuna naggorissarneqassalluni taamaasilluni tamanna isumannaalliseqqillugu, Whybrow oqarpoq, imatullu eqikkaavoq:

- Suliarput naammassippat saliinissaq sorpassuarnik imaqarpoq. Kisianni tamatigut qitiuvoq nuna tamanna misissueqqaalernitsinni isikkuatut isikkoqartillugu qimakkusukkatsigu.

Nunanit allaneersut nunaqavissullu sulisorineqarsimapput Kuannersuarni misissueqqaarnerni.

Greenland Minerals and Energy-miit aamma qulakkeerniarneqarpoq qinngualanerit ulorianartut sulisunut sunniutinnginnissaat.

- Uuttorsinnaavarput sulisuvut qanoq annertutigisumik qinngualanernit eqqorneqartarnersut. Maannamut uuttuisarnitsinni takusinnaavarput qinngualanernit annikitsuinnarnit tuffigineqartarsimasut. Aammattaaq radon aamma pujoralak uuttortartarparput maannamullu ernumaammernartunik suli siumuinngilagut, Jeremy Whybrow oqarpoq.