Krusep WWF isumaqatiginngilaa
![](/sites/default/files/styles/image_934x467/public/article_images/img_0834.jpg?itok=OfxUp158)
Qaanaami piniartut qaleralittassaminnik amerlanerusunik aalisarsinnaatitaasariaqarput. Taama pinngortitaq pillugu nunarsuaq tamakkerlugu suliniaqatigiiffik WWF isumaqatiginagu aalajanngersimalluni, tusagassiortunut nalunaarummi, aalisarnermut naalakkersuisoq Karl-Kristian Kruse allappoq.
Tamanna pivoq Kaare Winther Hansenip WWF-imeersup Karl-Kristian Krusep allaatigisaa oqaaseqarfigereerneratigut.
- Qaanaap eqqaani qalerallit pillugit iluamik ilisimasaqartoqanngilaq. Aalisarnerlu aallasatsinneqassappat ajalusoortoqarsinnaavoq, piniartuniillu aalisartunut ikaarsaartitsineq suliluunniit iluamik aallartinngitsoq ajoquserneqarsinnaalluni, Winther Hansen taama AG-mut oqarpoq.
Aamma atuaruk Uumassusilerisup ingerlatsivimmik pilersitsisoqarnissaa siunnersuutigaa
Taamatullu nalunaaruteqarnera Karl-Kristian Krusep kamaammissutigaa.
- Aamma WWF-ip isumaanut isumaqataanngilluinnarpunga, oqarmat aalisarneq pimoorunneqarlualerpat qalerallit nungullugit aalisarneqassasut, tusagassiortunut nalunaarummi Kruse allappoq.
Qeqertarsuup Tunuani qalerallit pisat Qaanaami pisanit amerlanerupput
Royal Greenlandip tunitsivianiit kisitsisini kingullerni takuneqarsinnaavoq qalerallit 138 tonsit ukioq kingulleq tunineqarsimasut taakkulu Qeqertarsuup Tunuani pisarineqartartunit ikinnerujussuusut, Krusep oqaatigaa.
- Aalisarneqarsimasut takutippaat aalisapiluttoqalersoq? Taamaaqqajanngilluinnarpoq, naalakkersuisoq oqarluataarpoq.
Aamma atuaruk Pisassiissutit Krusep paasisinnaannginnerarai
Qaanaami qalerallit amerlassusaat iluamik ilisimaneqanngitsoq, qanorlu aalisartoqartigisinnaaneranut amerlassutsit Qeqertarsuup eqqaaniittunut tunngavilersuutigalugit sanillersuunneqarsinnaanngitsut, Pinngortitaleriffimmi qaleralinnut tunngasunik ilisimatuup Rasmus Nygaardip erseqqissaalluni oqaatigaa.
- Qalerallit Qeqertarsuup Tunuaniittut tassaniiginnassapput, Qeqertarsuullu avataaniittut avataaniiginnartussaassapput. Tamanna aamma isumaqarpoq sumiiffinni assigiinngitsuni amerlassutsit assigiittariaqanngitsut. Taamaammat aalisagassat qanoq amerlatigisinnaaneri oqaatigineqarsinnaanngikkallarput.