Uumassusilerisup ingerlatsivimmik pilersitsisoqarnissaa siunnersuutigaa
![](/sites/default/files/styles/image_934x467/public/article_images/toerret_hellefisk.jpg?itok=0L1IjosP)
Aalisarnermut naalakkersuisup Karl-Kristian Krusep Qaanaami qaleralinnik tunisinerup annertusinissaa kissaatigaa.
Pinngortitaleriffiup aalisarnerup inerisarneqarnissaa tapersersorpaa, piffissamili sivisuumi tamanna ingerlanneqarnissaa oqaatigalugu.
Qaanaap eqqaani uumasut pillugit nalunngisat ullumikkut annikitsuararsuupput Qaanaallu eqqaani qaleralinniarneq ukiuni kingullerni ineriartorsimagaluartoq, suli annikippoq tamaanilu misissuinissamut suli aningaasanik tunngavissaqalernani.
Sumiiffiimmi allat pingaarnerupput, uumassusilerisoq Rasmus Nygaard oqarpoq.
Qaanaap eqqaani qaleralinniarnermut ingerlatsivimmik pilersitsisoqassasoq siunnersuutigaa.
- Aalisarnerup sukkavallaamik annertusinnginnissaa pingaartipparput, Rasmus Nygaard oqarpoq.
Allatut iliorneq ajornarpoq
Pinngortitaleriffimmi uumassusilerisup aalisarnerup qanoq ingerlannissaanut pilersaarusiortoqartariaqarnera erseqqissarpaa.
Aalisakkammi siunissaq isigalugu amerlanerusut aalisarneqarsinnaniassammata.
Qinigassarmi alla tassaavoq qaleraleerussinnaanera, taamaattoqassappallu qaleralinniarneq nungusaataalissaaq.
Aamma atuaruk Krusep WWF isumaqatiginngilaa
Taamaattoqassappallu uumassusilerisup aalisarneq ajornartorsiutaanavianngitsoq oqaatigaa.
- Maannakkutut aalisartoqartillugu aalisakkat nungukkiartulissappata taava aalisakkat ikissimassapput taamaappallu soqutaanavianngilaq, Rasmus Nygaard oqarpoq.
Ukioq kingulleq Qaanaami qalerallit 138 tonsit tunineqarput.
Krusep imartaq misissoqquaa
Aalisarnermut naalakkersuisup Karl-Kristian Krusep tusagassiummi nalunaarummi Qaanaap imartaani misissuisoqassasoq nalunaarutigaa.
Qaanaap kujammut avannamullu imartarujussuata pisuussutai misissorneqassasut, aalisarnermillu ilaatigut misileraasoqartassalluni, tamannalu Naalakkersuisoqarfimmit pilersaarusiortariaqarluni tamatumunnga susassaqartut peqatigalugit, aamma Pinngortitaleriffik tamatumani ilaatinneqassalluni, naalakkersuisoq allappoq.