Kruse Islandimi saarullinniarnermut sanilliussivoq
![](/sites/default/files/styles/image_934x467/public/article_images/rasmus_hedeholm_emma_kristensen_1.jpg?itok=0qsxcCB-)
Saarullinnut pisassiissutit biologit innersuussutaanit marloriaataaneri pillugit Naalakkersuisut sakkortuumik isornartorsiorneqarput. Nunattali sanilerisai saarullinnik pisaqarnerusarput.
Tamanna aalisarnermut naalakkersuisup ippinnartoqartippaa.
- Sanilerisatsinnut sanilliutissagutta, Island 236.000 tonsinik saarullittassaqarpoq, uagullu sinerissap qanittuani tonsiullutik. Nunami isorartuumi imartaqqortuumilu isigalugit, piuartitsinissamut innarliisussatut nipilerlugu oqaatiginissaa tunngavissaqanngitsoq isumaqarpunga, aalisarnermut naalakkersuisoq, Karl-Kristian Kruse oqarpoq.
Sanilliussinnaanngitsut
Taamatulli sanilliussisoqarsinnaanngitsoq, Pinngortitaleriffimmit oqaatigineqarpoq.
- Islandimi pissutsit allaapput, Kalaallit Nunaannilu pissutsit allaallutik. Taamaattumik sanilliunneqarsinnaanngillat, Pinngortitaleriffimmi attaveqaqatigiinnermut pisortaq Emma Kristensen taama oqarpoq.
Islandimi Norgemilu saarullinnik amerlanerujussuarnik pisaqartoqartartoq, Emma Kristensenip aamma ersersinniarpaa.
Norgemi saarullinnut pisassiissutit million tonsit missaaniipput.
Aamma atuaruk Pinngortitaleriffiup innersuussutini aalajangiusimavai
Nunatsinnullu sanilliullugit Norgemi saarulliit ukiuni arlaqartuni amerliartorsimapput, ullumilu pisarineqartut amerlanerujussuullutik.
- Ukiuni makkunani Islandimi Norgemilu saarullinniarneq ingerlalluartorujussuuvoq. Islandimi 250 000 tonsinik pisassiissuteqartarput, taavalu Norgep eqqaani Beringshavemi piffissap imaalinerani 1 million tonsimik pisassiissuteqartarlutik, Emma Kristensen taama oqarpoq.
Siunnersuinerit malikkaat
Taamaakkaluartoq Nunatta imartai saarullinnut pitsaanerulerpata, ingattaassillunilu saarullinniartoqanngippat, saarulliit amerleqqissinnaassasut, biologinit ilimagineqarpoq.
Islandip Norgellu imartai saarullinnut pitsaasuupput, aalisarnermilu periutsit aamma allaanerullutik.
Biologillu naapertorlugit taakku pissutaallutik nunani taakkunani saarulliit amerlipput.
- Pissutsit assigiinngitsut peqqutaallutik, soorlu immap kissarnerulernera, nerisassaqassusiat taavalu aamma uumasoqatiminnut nerineqartarnerat immaqa annikinnerulersimanera peqqutaalluni, Islandimi Beringshavemilu maannakkut saarullippassuaqarpoq. Kisianni biologit siunnersuinerat malillugit ukiorpaalunni ingerlanikuugamik, taamatut amerleriaqqinnikuupput, Emma Kristensen taama oqarpoq.
Aamma atuaruk Aalisarneq Pillugu Siunnersuisoqatigiit: Inassutinik malinnippoq