USA-mi inatsisartut ataatsimiititaliaata Trumpip nammineq nalunaarsuineri tigusimagai
USA-mi Innuttaasut sinnerlugit sinniisoqarfimmi, tassa Repræsentanternes Husimi ataatsimiititaliap, USA-p præsidenterisimasaata Donald Trumpip nammineq nalunaarsuineri tigusimavai.
Ataatsimiititaliap Trumpillu akornanni ukiualunni aaqqiagiinngissuteqartoqareersorlu Trumpip nammineq nalunaarsukkani maanna tunniuppai. Ataatsimiititaliaq demokratineersumik siulittaasoqarpoq.
Trumpip ataatsimiititaliaq politikkikkut malersuiniartutut pasivaa.
USA-mi eqqartuussiviit qullersaata aalajangiineratigut Trumpip nammineerluni nalunaarsukkani ataatsimiititaliamut maanna tunniuttussanngorpai.
Ataatsimiititaliap nammineq nalunaarsukkat 2015-imit 2020-meersut piumasarisimavai.
AAMMA ATUARUK Eqqartuussiviit qullersaasa Trumpip akileraartarnermut paasissutissaataasa tunniunneqarnissaat akuerigaa
Ataatsimiititaliap pissaaneqaqisup, assersuutigalugu akileraartarnermut tunngasunut apeqquteqaatinik eqqartuisarpoq.
USA-mi akileraartarnermut aqutsisoqarfiup IRS-ip præsidentip akileraartarsimaneranut tunngasuni pissusissamisoortumik sullissinersoq ataatsimiititaliap aalajangiivigisarpaa, tassungalu atatillugu nammineq nalunaarsukkat tunniunneqarnissaat piumasarisimallugu.
Trump USA-mi ukiut kingulliit 40-t ingerlaneranni præsidentiusarsimasut akornanni siullersaalluni akileraartarnermut paasissutissanik tunniusserusuttuusimanngilaq.
Republikanerit sinnerlugit præsidentiusimasup, præsidentimut 2024-mi qinersisoqarnissaanut qinigassanngorteqqinnini qanittukkut nalunaarutigaa.
Præsidentimut pingajussaa maanna sassarpoq. Siullermik 2016-imi, tassanilu qinigaavoq, præsidentimullu 2020-mi qinersisoqarmat, demokratimut Joe Bidenimut ajorsarluni.