Eqqartuussiviit qullersaasa Trumpip akileraartarnermut paasissutissaataasa tunniunneqarnissaat akuerigaa
USA-mi inatsisartuni kongresimi ataatsimiititaliat ilaata, USA-p præsidenterisimasaata Donald Trumpip akileraartarsimanermut uppernarsaatai takorusuppai, akileraartarsimanermullu takussutissat taakku ataatsimiititaliamut tunniunneqarsinnaasut, USA-mi eqqartuussiviit qullersaata aalajangerpaa.
Nutaarsiassaqartitsivik Reuters taama allaaserisaqarpoq.
Eqqartuussiviit qullersaata taama aalajangerneratigut, republikanerit sinnerlugit præsidentiusimasoq ajorsarpoq.
Akileraartarsimanermut pappilissat tunniunneqarsinnaanissaannut piumasaqaat politikkikkut malersuiniarnerusoq Trumpip oqaatiginikuuaa.
Akileraartarsimanermut takussutissat tunniunneqartariaqannginnerat tunngavilersuutigalugu, suliaq Trumpip eqqartuussiviit qullersaannut tunniuppaa, eqqartuussiviup aalajangiipallannissaa aamma piumasaralugu.
Trumpip akileraartarsimanermut takussutissaataasa tunniunneqarnissaat, eqqartuussiviit taama qullasitsigisumiinngitsut ilaata siusinnerusukkut aalajangerpaa, Innutttaasut sinnerlugit sinniisoqarfimmi, tassa Repræsentanternes Husimi, ataatsimiititaliat ilaata tamanna piumasarimmagu.
Trumpip præsidentimut 2024-mi qinersinissamut qinigassanngorteqqinnini nalunaarutigeqqammerpaa, kongresimilu ataatsimiititaliap piumasaqaataata saniatigut Trump eqqartuussivitsigut assigiinngitsutigut aamma suliassanngortinneqarnikuulluni.
Trump, USA-mi ukiuni qulikkuutaani sisamani kingullerni præsidentiusimasut akornanni siullersaalluni akileraartarsimanerminut takussutissanik saqqummiusserusussimanngilaq.
/ritzau/Reuters
