Kommunit kattussuuppata borgmesterit ataannassapput
Kommunit kattussuutissapput, aammali borgmesterioreersut ataannassallutik.
Kommunit tallimaasut tassaasut Nuuk, Paamiut, Ivittuut, Ammassalik, Illoqqortoormiullu ataatsimuulerunik kommunerujussuanngussaaq, illoqarfinnilu immikkut borgmesterissanik qinersisoqassalluni.
Kommunip allaffioreersut immikkoortortaqarfinngussapput.
Taama kommunit tallimaasut inatsisartunut siunnersuusiorput.
Qanimut tikillugu tamanut oqartussaaqataaneq. Oqaaseq taanna kommunit tallimaasut kattussuuttussat uteqattaartuarpaat, oqaaserlu taanna illoqarfinni pineqartuni sooq immikkoortortaqarfinni borgmestereqarnissaanut inatsisartunut siunnersuusiaminnut patsisilersuutigaat. Siunnersuusiami ilaavortaaq maanna rådhusioreersut immikkoortortaqarfinni rådhusinngussasut.
Immikkoortortaqarfinni rådhuseqanngippat tassanilu ingerlatsisussamik soqanngippat, taava qanimut tikillugu tamanut oqartussaaqataanerup innarlerneqaratarsinnaanera ernumassutigaarput. Soorlu assersuutigalugu Illoqqortoormiuni kommunit kattussuuppata qanimut tikillugu oqartussaaqataaneq ulorianartorsiulersinnaavoq.
Taama Illoqqortoormiuni borgmesteri Erling Madsen radioavisimut oqarput.
Immikkoortortani borgmesterit rådhusillu ikaarsaarfiup nalaani pinngitsoorneqarsinnaanngillat, erling madsen naliliivoq.
Inuit allaffimmut ornigullutik oqaloqateqarsinnaanerat qanimut tikillugu tamanut oqartussaaqataanermut pingaaruteqarpoq. Kvik-skrankinik taasartagaanik, videokkullu attaveqarsinnaaneq eqqartorsimavarput, kisiannili tikillugit oqaloqateqarsinnaanermiit toqqissisimananngineruvoq. Erling Madsen oqarpoq.
Lars Sørensen Paamiuni borgmesteriusoq erling madsenip oqaasiinut tapersiivoq. Lars Sørensenip immikkoortortaqarfinni rådhuseqalersinnaanera takorloorpaa. Immikkoortortaqarfiillu allaffissoriaatsit nutaat, assersuutigalugu inissianut tunngasut isumagisarsinnaavaat akisussaaffigilerlugu, kommunerujussuaqalerpammi namminersornerullutik oqartussat taama iliulersaarmata. Qanimut tikillugu tamanut oqartussaaqataaneq lars sørensinnimuttaaq pingaaruteqartuuvoq.
Nammineq ilisimasavut naapertorlugit inuit nammineq qinikkaminnut saaffiginninnissartik toqqissisimanarnerutittaraat nalunngilarput, taannami innuttaasunut allaffeqarfimmullu attaveqaataammat, taama Lars Sørensen radioavisimut oqarpoq.
Immikkoortortaqarfinnut borgmestereqarnissaq rådhuseqarnissarlu marloriaammik allaffissornermut aningaasartuuteqarnerulissutaassanersumut apeqqut, erling madsenip ima akivaa: Ikaarsaarfiup nalaani allaffissornermut aningaasartuutinut sipaartoqarsinnaassanngilaq, sipaarsinnaanerigaluarmullu naatsersuutit eqquutsinneqarsinnaassanngitsut nammineq ilimagalugu.
Kommunet tallimaasut inatsisartunut siunnersuusiaat nassiunneqareerpoq. Inatsisartullu upernaamut martsip 9-ani aallartittussami ataatsimiilerpata kommunit akissutisinissartik naatsersuutigaat.
