Qulaarpaa Kommunip avinneqarnissaanut eqqarsarluartoqaqqaassasoq
Kommunit amerlasuunik innuttaasullit aningaasartuutinut akiliinissaminnut periarfissagissaarnerusut, kommunerujussuanngortitsinermut suliami piareersaasut siuttuat Martha Labansen oqarpoq.
- Kommunit innuttakinnerusut akileraarutitigut isertitsinissaminnut perfissaat annikinnerulertussaavoq. Taamaalillunilu innuttaasuminnut tunniussinnaasaat killeqartussaassallutik, Martha Labansen Qaasuitsup Kommunia avinneqarpat kommunissani innuttaasut ikinnerunissaat pillugu oqarpoq.
Aamma atuaruk Qaasuitsup akiligassaq akilissavaa
Aaqqissuussaanermut Isumalioqatigiisitap isumaliutissiissutaani periarfissatut innersuussutigineqartut ilaat kommuninit Namminersorlutik Oqartussaniillu malinneqarsimanngitsut, Labansenip oqaatigaa. Kommunimmi kattunneqarput, tamatumali kingorna suliassanik kommuninut nussuinermut suliaq unittoorsimavoq.
Qaasuitsup Kommunialu marlunngorlugu avinneqarpat kommunissani innuttaasut ikinnerulissapput. Innuttaasullu ikippallaarnerat suliassanik nussuinnginnissamut politikerinit tunngavilersuutigineqarnissaa, Martha Labansenip ernummatigaa.
Aamma atuaruk Avinnerup iluaqutaanissaa qularnartoq
Innuttaasullu oqartussaaqataanertik ajorseriartutut misigigaat kommunip avinnissaanut tunngavilersuutigineqartarpoq. Innuttaasullu oqartussaaqataarnerat sunniuteqaqataasinnaanerallu ajorseriarsinnaasut isumalioqatigiisitap erseqqissaatigisimavaa.
- Taamaattumillu innersuussutigalugu, nunaqarfinni aqutsisut ilusiisa assingajaannik illoqarfinni kommuneqarfiunikuusuni ataatsimiititalianik siunnersuisartussanik kommunalbestyrelsini pilersitsisoqarsinnaanera, Martha Labansen oqarpoq.
Aamma atuaruk Kommunip avinneqarnissaa arlaannaataluunniit akilerumanngikkaa
