VIDEO Kommunefogedit siulittaasuat: Kommunefogedit pikkorissarneqartalerlik
Taamaattumik amerlasuut piareersimasanngitsut taamaatiinnartartullu arlaqarput, kommunefogedit siulittaasuat pikkorissaqqaartarnissamik piumasaqartoq oqarpoq.
- Tassa taakkua tunniunneqarput, taavalu taassuma allamik kingorna tungaani naamik, kommunefogedit siulittaasuat, Isak Christensen, oqarpoq.
Aamma atuaruk VIDEO Kommunefogedit pillugit politikikkut suliniartoqalerpoq
Nunatsinni nunaqarfiit pingajorarterutaat ullumikkut kommunefogedeqanngillat, tamannalu arlalinnik peqquteqartoq kommunefogedit siulittaasuat isumaqarpoq.
Annermilli kommunefogedinngortut atortussaanik tuniinnariarlugit pikkorissarneqartannginneri peqqutaasoraa.
- Tupiginngilara ilaasa sivikitsumik kommunefogedioriarlutik tunuartaraluarpata. Aammalu kommunefogedissaaleqineq maannakkut saqqummiunneqaqattaartoq, Isak Christensen oqarpoq.
Aamma atuaruk VIDEO Kommunefogedeqarniarneq peqqinnissaqarfimmut sunniisarpoq
Nuna tamakkerlugu kommunefogedit kingullermik 2012-mi pikkorissartinneqarput. Kommunefogedilli nunaqarfinni politiitut sulisariaqartartut pikkorissarneqarneq ajornerat siulittaasup sakkortuumik isornartorsiorpaa. Illoqarfinnimi politiinngorusuttut ilinniaqqaartarput.
- Kommunefogeditut atorfininniarneq taamatuulli ilusilersorneqartariaqalerpoq, maannakkut pissusiusoq qimallugu. Qangarsuarli meeraavugulli, asuli taamatut tiguinnarlugu atorfinitsinneqartarput. Arlaatungaatigut misilittaatinngilluinnarlugit, kommunefogedit siulittaasuat oqarpoq.
Aamma atuaruk VIDEO Nunaqarfinni kommunefogedeqarniarneq ajornartorsiutaavoq
Isak Christensenip Upernavik Kujallermi ukiut 40-t missaani kommunefogeditut sulisimagami suut aqqusaarneqartarnersut ilisimalluarpaa. Kommunefogedissaaleqinermilu pikkorissarneqarneq ajorneq kisimi peqqutaanngilaq. Aamma ulluinnarni atukkat pineqarput. Allaffeqanngillammi isertitsiveqaratillu. Eqqissiviilliortullu...
- Silaannarmiissinnaanngikkaangata. Angerlarusunngikkaangata angerlarsimaffimminnut angerlarsimaffitsinnut apuuttarparput. Tassani ilaatigut eqqissinanngikkaluartumik aaqqinnissaa tikillugu ilagisarlutigit, Isak Christensen oqarpoq.
Aamma atuaruk Kommunefogedinut atugassarititaasut pitsanngorsarneqartut
Maannali tamakku tamarmik eqqartorneqartariaqalerput.
- Kommunefogedinngorniarneq arlaatigut pilerinarsarneqarsinnaappat. Taava immaqa kajungerninngortut amerlaninngorsinnaapput. Aningaasat tungaatigut taanna aaqqippoq. Malugusuutigeqaarput, kommunefogedit siulittaasuat Isak Christensen oqarpoq.
Aamma atuaruk Kommunefogedessarsiorneq sukanniarpaat
Kommunefogedit aningaasarsiaat 2012-mi qaffanneqarput. Kalaallillu Nunaanni Kommunefogedit Peqatigiiffianni ilaasortat 20-t sinneqarput.
Atisat sullisit, anaataq, pinerluttunut paffequtsiunneqartartut mobiililu, tassaapput kommunefogedinngortunut tunniunneqartartut.
