VIDEO Nunaqarfinni kommunefogedeqarniarneq ajornartorsiutaavoq

Nunaqarfinni kommunefogedeqarniarneq suli ajornartorsiutaavoq. Nunaqarfinnimi 57-ini 17-it kommunefogedeqanngillat.

Kommunefogedit amigaataanerat akissaatitigut qaffaanikkut 2012-imi qaangerniarneqaraluarpoq, tassa akissarsiat ilaatigut 7.300 koruunimiit ukiumut aalaakkaasumik 75.000 koruuninngortinneqarlutik.

Taamani nunaqarfiit 19-it kommunefogedeqanngillat. Imaappoq akissarsiat qaffannerata kingorna ajornartorsiut aaqqinneqarsimanngilaq. Nunaqarfiit ilaanni aamma kommunefogedeqanngitsuni tamanna toqqissisimanngissutaasarpoq.

Aamma atuaruk Nunatsinni pinerlussimasunut isertitsiviit sakkortuumik isornartorsiorneqarput

Nunaqarfimmi Attumi 250-it tungaannut innuttaasoqartumi ulluinnarni inuuneq eqqissisimanartuuvoq.

- Eqqissisimanartorujuuvoq, imatut nunaqqatigiit immitsinnut ilisarisimagatta tamatta, Bebiane Karlsen Attumi inuttaasoq KNR-imut oqarpoq.

Najugaqarfiilli allat assigalugit ilaanni ajortoqarsinnaasarpoq. Taamaattoqartillugulu iliuusissaaleqinartarpoq.

- Massakkoqqissaaq saaffissaqanngilagut nunaqarfitta iluani, Bebiane Karlsen oqarpoq.

Aamma atuaruk Kommunefogedinut atugassarititaasut pitsanngorsarneqartut

Attormiullu pisoqartillugu saaffissaqanngikkunik Aasiannut Politiinut ukiup affaa kingulleq kommunefogedeqannginnamik saaffiginnittarput. Taakkuli umiatsiamik sukkasuuliamik takkutissagunik nalunaaquttat akunneri marluk pingasulluunniit iluani aatsaat apuussinnaapput.

- Aalaakkaasumik saaffissaqanngikkaangatta nunaqarfitta iluani pisoqaraangat toqqissisimanartanngilaq. Ingammik nalunagu kommunefogedetut atorfeqanngitsoq akuliutsinneqaraangat. Unaana eqqarsaatigisaratsigu illersorneqarnissaa taanna orniguttoq, Bebiane Karlsen Attumiit oqarpoq.

Kommunefogedet tassaapput politiit nunaqarfinni ikiortaat, assersuutigalugu politiinut suliassanngortitassanik ingerlatitseqqissinnaasarput, eqqissiviilliortoqartillugu orniguttarlutik, annerusumillu pinerluttoqarsimatillugu politiit takkunnissaannut pasisanik tigusarinnissinnaasarlutik. Kommunefogedilli pissarsiariniarneri ajornartorsiutaasarpoq.

Aamma atuaruk Sara Dorisilu isumaqatigiinngillat

- Nunaqarfippassuupput, qanorluunniillu tamaasa kommunefogedeqartinniaraluarutsigit ajornarpoq. Soorlu aamma peqqinnissaqarfiup nunaqarfinni sulisussatik aamma ajornartorsiutigisaraat. Pitsaanerpaanik iliuuseqaraluarpugut, nassuerutigissavarpulli nunaqarfiit ilaanni kommunefogedeqartitsiniarneq allanit ajornarnerusarmat, Morten Nielsen, Kalaallit Nunaanni Politiini unnerluussisuuneq KNR-imut oqarpoq.

Kommunefogedit pissarsiariniartarneri qangaaniilli ajornartorsiutaasarpoq, aamma 2012-imi akissarsiat qaffanneqareeraluartut.

- Maanna akissarsiaat ajunngitsorujussuupput taakkuli apeqqutaanerpaanngillat aamma sulinissaq kajumigineqartariaqarpoq, Morten Nielsen oqarpoq.

Aamma atuaruk Kommunefogedessarsiorneq sukanniarpaat

Nunaqarfimmilu inuuneq eqqissisimanartaraluartoq kommunefogedeqarnissaq pisariaqarpoq.

- Pingaarutilerujussuuvoq, tassami eqqissisimananngilaq ullormiit ullormut nalusarparput qanoq pisoqassanersoq, ajortoqaavikkaluarpammi? Bebiane Karlsen aperaaq.

Nunatsinni nunaqarfiit sisamat marlunnik kommunefogedeqarsinnaatitaapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat