Kommunefogedessarsiorneq sukanniarpaat

Nunaqarfiit 19-it ullumikkut kommunefogedeqanngillat, tamannali maanna iluarsiivigineqalersoq, politimestereqarfimmi allaffissornikkut pisortaq Claus Risbjerg taama oqarpoq.

- Nunaqarfiit kommunefogedeqanngitsut tamarmik nittarsaassinitsigut kommunefogedeqalernissaat anguniarparput, Claus Risbjerg, politimestereqarfimmi allaffissornikkut pisortaq oqarpoq.

Kommunefogedissarsiortoqaleraangat iluatsitsilluarnissaq kissaatigineqartaqaaq, kommunefogedinngorumaartussanullu atugassarititaasussat pitsanngorsaaviginiarneqarlutik.

Kommunefogedit maannamut 7300-t 50.000-it koruunillu akornanni ukiumut aningaasarsiaqarput, tamannali maanna 75.000-inngortinneqassaaq, nalunaaquttallu akunneri suliffiusimasut saniatigut aningaasarsiaqaataasalissallutik.

Ulluinnarni suliaminnut piginnaanngorsarneqassapputtaaq, Claus Risbjergillu kissaatigaa nunaqarfiit maanna kommunefogedeqanngitsut ungasinngitsukkut kommunefogedeqalerumaartut.

- Kommunefogedissarsiorneq maanna aallartissaaq, ajornassanngippallu nunaqarfinni ataasiakkaani najugalinnik atorfinitsitsiniarluta. Qinnuteqartut qassiunersut takusinnaalerutsigu nunaqarfinni kommunefogedeqanngitsuni qaammatini tulliuttuni atorfinitsitsiumaarpugut, pikkorissartitsinerillu kingorna pilersaarusiulerumaarlutigit, Claus Risbjerg oqarpoq.

- Kommunefogedinngorniaraanni taava pineqaatissinneqarsimannginnissaq piumasaqaataavoq, soorlu politiinngornianut tamanna aamma piumasaqaataasoq, nunaqarfimmili aamma ataqqisaanissaq pingaaruteqarpoq, Politimestereqarfimmi allaffissornikkut pisortaq Claus Risbjerg oqarpoq.

Kommunefogedinngorumaartussat aningaasarsiarisassaannut aningaasartuutit politiinut ukiumut aningaasartuutigineqartussatut missingersuutigineqartartuni nassaarineqarsinnaasut, Claus Risbjergip naatsorsuutigaa.