Kommunefogedinut atugassarititaasut pitsanngorsarneqartut
Kommunefogedit eqqartorneqaleraangata akissarsiat qitiutinneqartarput. Akissarsiammi akisussaaffimmut suliassanullu naapertuussimanngillat. Tamannalu maanna iliuuseqarfigineqarpoq. Kommunefogedit siunissami Naalagaaffiup politiivinik sullissinerminni nalunaaqquttap akunneri atukkatit najoqqutaralugit akissarsiaqartinneqalissapput.
-Kommunefogedinut sulinermi atugassarititaasut pitsanngorsarneqarnissaannut 2012-imi suliniuteqartoqarsimanera nuannaarutigaara. Kommunefogedit Kalaallit Nunaanni pingaarutilimmik suliaqartuupput, tamannalu sulinermi atugassarititaasutigut aamma ersersinneqartariaqarpoq, IA sinnerlugu Folketingimut ilaasortaq Sara Olsvig oqaluttuarpoq.
Kalaallit Nunaanni kommunefogedit maannakkorpiaq 50-iupput taakkunanngalu 36-it sulinerminni ilisimasatigut suliatigullu piareersimalluarnerunissaat anguniarlugu pikkorissaanermut nutaamut peqataatinneqareerput. Tamatuma saniatigut Nunatsinni kommunefogedit aamma Naalagaaffiup politiivinit pitsaasunik atortulersorneqarnissartik qilanaarisinnaavaat. Ilaatigut tassaapput uniformit, politiip anaataa paffequtillu savimerngit, kiisalu oqarasuaat angallattagaq.
-Kommunefogedit pillugit suliaq suli naammassineqanngilaq, Kalaallit Nunaannimi nunaqarfiit tamarmik kommunefogedeqartariaqarput. Naalagaaffiulli politiivisa Kalaallit Nunaanni nunaqarfiit sinnerinut kommunefogedinik piukkunnartunik pissarsiornissaq suliassani sallersaanerarlugu oqariartuuteqarnerat nuannaarutigaara, Sara Olsvig nassuiaavoq.