Kommune Kujalleq naligiissaarineq pillugu naammagittaalliutissaqarpoq

- Uagutsinnut pingaaruteqarluinnarpoq, pisortat piliaannik suliffiit pilersinneqartartut taakkua akileraarutitigut isersitaqaataassutigineqartarnerat, taanna naligiimmik Nunatsinnut innuttaasunullu tutsissallugu. Taanna uani aaqqissuutaaagallartumi anguneqarsimanngilaq, Jørgen Wæver Johansen Namminersorlutik Oqartussat suliffeqarfiini sulisup akileraarutaa, sulisup kommunianut tutsinneqartannginnissaanut piumasarigaluami pillugu oqarpoq.

Kommuni Kujalleq naligiissaarinermi pisartakkami qaavisigut ukiuni pingasuni tulliuttuni ukiumut 15 millionit koruuninik pisarsisussaagaluartoq, taamaattoq tamanna borgmesterip suli naammagivinngilaa.

Ataaseq naammagisimaarinnilluarpoq

Kommunini naligiissarinermut akiliinerusalertussatuap, Kommuneqarfik Sermersuup, aaqqissuussaagallartoq nuannarinngilluinnarpaa, Qeqqata Kommunialu aningaasanik amerlanernik perusukkaluarluni.

Qaasuitsup Kommunia kisiartatuaalluni naammagisimaarinnilluarpoq.

Kommunit naligiissarneqarnerannut aaqqissuussaagallartoq atajuartussamik aaqqissuussaanngitsoq, Kommune Kujallermit aamma nuannaarutigineqarujussuanngilaq.

Atorsinnaavoq

Naak aaqqiigallarneq Kommuni Kujallermit ippigineqaraluartoq, Jørgen Wæver Johansenip tamanna atorsinnaalluartutut nalilerpaa.

- Uagut angorusutarput allaasimavoq. Kisianni una aaqqissuussigallarneq, ukiuni pingasuni atuuttussaq, taanna uagut ataqqillugu ingerlariaqqissaagut, Jørgen Wæver Johansen oqarpoq.

Aningaasat sumut atorneqassanersut suli aalajangerneqanngilaq. Kommunalbestyresimit ukiumut missingersuutit inissitsiterneqarpata tamanna nalunarumaanngitsoq, borgmesteri oqarpoq.

Naligiissaarinermi Kommune Kujalleq aningaasanik pissarsiaqartussaagaluarluni aningaasaqarniarnera imaaliallaannaq aaqqinnavianngitsoq, Jørgen Wæver Johansenip aamma oqaatigaa.

- Qularutissaanngitsoq unaavoq, taakku aningaasat isertinneqaraluarpata, suli pisariillisaaneq sipaarniarnerillu ingerlanneqartussaasariaqartussaammata, Jørgen Wæver Johansen oqarpoq.

Kommuneqarfik Sermersooq naligiissaarinermi akilertagaasa qaavisigut, kommunini ukiuni tulliuttuni pingasuni ukiumut, 45 millionit koruuninik akiliisalissaaq.

Qaasuitsup Kommunia pisartakkami qaavisigut ukiumut, 25 millionit koruuninik pisalissasoq Qeqqata Kommunia pisartakkami qaavisigut ukiumut 5 millionit koruuninik pisalersussaavoq.