Qeqqatta Kommunia aaqqissuusseqqinnermik assut naammaginninngippoq

Aammattaaq Qeqqata Kommunia aaqqissuusseqqinnermut assut naammaginninngippoq.

Kommunimi nalimmassaanissatut siunnersuummi maanna atorunnaartumi pissarsinerusussaasimagaluarpoq. Borgmesteri naapertorlugu taarsiullugu maanna kommuni piitsuunerpaanut ilannguttussanngorpoq.

- Isumaqarpunga, Qeqqata Kommunianinngaanniit aningaasanik aqutsinerput, 2009-mili kommunerujussuanngornitsinni naleqqussagarput, soorlu soraarsitsinerit allarpassuillu sulisunik ikilisaanerit ilanngullugit, eqqarsaatigalugit aqutsilluarsimasutut oqaatigineqarsinnaanerput, tassuunartaatigut soorlu pillarneqartugut, Qeqqata Kommuniata borgmesteria Hermann Berthelsen oqarpoq.

Aamma atuaruk Naalakkersuisut naligiissaarinermut aaqqiissutissaagallartunik saqqummiussipput

Kommunit akornanni nalimmassaanerugallartumi, 2016-imiit 2018-ip tungaanut atuuttussami, Qeqqata Kommunia ukioq mannamut naleqqiullugu 5 millioner koruuninik pissarsinerusussaagaluarpoq.

Nalimmassaanissatut siunnersuummi atorunnaartumi, Qeqqata Kommunia ukioq mannamut naleqqiullugu 28 millionit 31 millioner koruunillu akornanni pissarsinerusussaagaluarpoq.

- Inummut ataatsimut naatsersuinermi Qeqqata Kommunia kommunini piitsuunerpaanngussaaq, Hermann Berthelsen oqarpoq.

Siunnersuutaagaluartoq itigartinneqarpoq paasissutissat amingartut pissutigalugit,  aammalu aningaasartuutinik nalunaarsuutit kisitseriaatsillu assigiinngissimammata.

Tamannali Hermann Berthelsenip utoqqatsissutissapalaatut isigivaa, aaqqiinissaagaluamit ataavartussamiit, akisussaaffimmillu qimarratiginninnertut taallugu.

- Kisitsisit piumasatik qaqugukkulluunniit pisinnaavaat. Aamma kisitsisit allat modelit 50-ingajaat, siusinnerusukkut natsersuusiarineqarsimasut, pigereerpaat, Hermann Berthelsen oqarpoq.

Ugguarnerarlunilu maanna kommunip aaqqiineq ataavartussaq suli utaqqeqqittariaqarmagu.

- Neriuutigisimagaluarparput, Naalakkersuisut atuuttussavimmik toqqaasimassasut. Ukua model 1 aamma model 2 atuuttussavittut toqqarneqarsimasinnaagaluarput, taamaalillutatoqqissilluta aningaasaqarnerput ingerlassinnaaniassagatsigu, sumiikkaluaruttaluunniit, Qeqqata Kommuniani borgmesteri Hermann Berthelsenoqarpoq.