Illersornissaqarfik sipaassaaq: Sakkutuut paarsissapput qarasaasiakkullu pisuusaartitamik nakersartassallutik

Sakkussiornermut milliardilikkaanik aningaasartuutissat Illersornissaqarfiup, pingaarnersiuinermini allannguinikkut 2033-llu tungaanut 13 milliardit koruuninik sipaarniuteqarnikkut, nammineq aningaasartuutigissavai.

Tusagassiuutinut nalunaarut naapertorlugu politikkikkut amerlanerussuteqartut tamanna isumaqatigiissutigaat.

- Maannakkut isumannaallisaanermut politikki pissutigalugu illersornissamut ministeriaqarfiup aningaasaatai silatusaartumik qanoq atorneqarsinnaanersut misissortuartariaqarparput, illersornissamut ministeri Troels Lund Poulsen (V) oqarpoq.

Isumaqatigiissutip immikkoortuata aappaani politikkikkut amerlanerussuteqartut misissuisoqarnissaa isumaqatigiissutigaat, maannalu tamanna naammassivoq partiillu isumaqatigiissummik suliaqartut, suliniutit 15-it isumaqatigiissutigaat.

Aningaasat 14,7 milliardit koruunit immikkoortinneqarnissaat siunertaavoq, taamaattumik pitsanngorsaaffissanik suli ujartuisoqassaaq.

Issittoq pillugu isumaqatigiissutit ilaat aamma timmisartunik F-35-nik 16-inik pisineq pissutigalugit illersornissamut aningaasaateqarfik 315 milliarder koruuninik nalilik imaaruttutut taaneqarsinnaanngortorlu, misissuineq tamanna pivoq.

Sipaarniarnermit eqqugaaneq

Assersuutigalugu sakkutuut paarsisutut nakkutilliisutullu atorneqarnerulertariaqalissapput, taamaaliornikkut aalajangersimasumik atorfillit allanik suliaqarsinnaaniassammata.

Tamanna 2,2 milliardit koruuninik sipaarfiussaaq illersornissamullu sakkutooqarfimmik ineriartortitsinissamut sakkutuut pisariaqartinneqartut taamaaliornikkut qulakkeerneqassapput. 

Sakkutuut qarasaasiatigut pisuusaartitsineq atorlugu nakersartalissammata paassanut aningaasartuutit sipaarniarfigineqassapput.

Tamanna 1,1 milliardit koruuninik sipaarutefiussaaq, sakkutuullu qamutaat pillugit qarasaasiatigut pisuusaartitsineq atorlugu ilinniartitsineq, 800 millionit koruuninik sipaaruteqarfiussalluni.

Sakkutuussamaatit aallartinnagit sakkutuut nunanit tamalaaneersut aallartikkaanni, tamanna 2 milliardit koruninik aallerfiussaaq.

F-35-nut pilersaarusiaq nunamilu sakkutooqarfik nutaaq katillugit 3 milliardit koruuninik sipaaruteqarfiussapput. Nalunaarusiaq naapertorlugu aningaasat taakku atunngitsuugassatut nalunaarsoqqareersimapput.

Sakkutuut sorsuutai qamutit qaleruarsuallit sakkutuut 1. Brigadeata pissarsiariniagassai,  sakkutuut pisariaqartitaat naapertorlugit qaleruarsuakinnerussapput.

Sakkutuut timmisartui Challengerit ilaatigut ministeriusunik angallassinermut alapernaarsuinermullu atorneqartarput, taakkuli atorunnaarsinneqariartuaalissapput.

Suliassat avataaneersunit 2027-miit suliarineqartussanngorput, taamaalilluni 800 millionit koruuninik aallerfiussalluni.

/ritzau/