Tusagassiuut: Sakkutuunngorniartut nunatsinnut suliartortitaasinnaasut
Illersornissaqarfik sakkutuutut ilai angerlartinniarlugit sakkutuunngorniartut arlallit Kalaallit Nunaannut aallartinniarlugit pilersaaruteqarpoq.
TV 2 sakkutooqarfimmit allakkiat isertuussat tusagassiuutip pissarsiarisimasai tunngavigalugit taama allaaserinnippoq.
Tusagassiuutip paasissutissiinermi takusaani, sakkutuut pisortaat Peter Boysen allappoq, sakkutuunngorniartut Kalaallit Nunaanni suliassanut atorneqartalernissaat pilersaarutaasoq.
Paasissutissiineq sakkutooqarfiup qullersaannut suleqatigiissitaliamut sakkutuullu kattuffiannut marsimi nassiunneqarpoq.
TV 2-ip paasissutissiinera naapertorlugu sakkutuunngorniat sakkutuut naalagaannit aqutsisulerlutik attaveqaatinik pingaarutilinnik qaammatip ataatsip missaani nakkutilliisussaapput illersuisussaallutillu.
Tusagassiuutip nutaarsiassiinera naapertorlugu septembarimi aallartussanngorput.
'Alianartoq'
Tom Block, sakkutuut paarsisuisa kattuffianni siulittaasoq oqarpoq, aalajangerneq sakkutuut amigaataanerannik ersersitsisoq.
- Tassunga killinnerput sakkutuunngorniartut Kalaallit Nunaanni suliassat ilarpassuinik suliaqartinneqartariaqalernerat alianarpoq. Ukiup affaa tunngaviusumik ilinniareerlutik suliassanik taama pingaaruteqartigisunik tigusisinnaanersut ernummatigaara, taanna TV 2-mut oqarpoq.
Sakkutuujusariaqarnerup sivitsorneqarneratigut sakkutuunngorniartut sakkutuut suliassaannik amerlanerusunik suliaqalernissaat naatsorsuutigineqarpoq.
Politikkikkut amerlanerussuteqartut sakkutuunngorniartut nakkutilliisutut atorneqarnerusariaqarnerat oktobarimi isumaqatigiissutigaat.
Sulisut aalajangersimasut suliassanut allanut atorneqarsinnaalernissaat qulakkeerneqartariaqarnera taamanikkut allassimavoq.
Sakkutuut naalagaat Kalaallit Nunaanni pissutsit pillugit oqaaseqanngitsoq, TV 2 allappoq.
Sakkutuunngornissamut piumasaqaatit nutaat februaarimi 2026-mi atuutilersinneqarput.
/ritzau/
