Inatsisartut pinerluuteqarsimasut ukiunik 16-inik pineqaatissinneqarsinnaalersillugit sivitsuisut

Inatsisartut pineqaatissiisarnermi killerititap ukiunit qulinit 16-inut qaffanneqarnissaa aalajangerpaat – alloriarneq tamanna pinerluuteqarnernut sakkortunerpaamut sunniuteqarnerpaassaaq.

- Eqqartuussiveqarfimmut tatiginnittoqaannassaguni inuiaqatigiinnit assigiinngitsunik pinerluuteqarnernut pineqaatissiissutaasa aamma pinerliiffigineqartut inuiaqatigiillu naapertuilluartoqarnerannik isiginninnerisa akornanni ataqatigiittoqassaaq.

Inatsisit atuutsinneqarnerannut naalakkersuisoq, Naaja Nathanielsen taasisoqannginnerani oqaaseqartarfimmit taama oqarpoq.

Naalakkersuisup oqarnera naapertorlugu allannguineq eqqartuussiveqarnermi annertuumik aaqqissuusseqqinnermi siulliunnarpoq.

- Eqqartuussiveqarnerup aaqqissuuteqqinnissaanut piareersarpugut, pinerluttulerinermi inatsisip akisussaaffigilernissaanut periarfissaqarluta. Naalakkersuisut pinerluttulerinermi inatsimmi tunngaviusut, matumani pineqaatissiinerit pinerluutinullu ataasiakkaanut pillaasarnermut killissarititat atornagit pillaateqartalernissamik atuutsitsilernissamut periarfissat oqaluuseriniarlugit partiit aggersartareerpaat.

Siunnersuut akerliusoqarani 26-nit akuersissutigineqarpoq.

Pisuni immikkut ittuni

Inatsisinut ataatsimiititaliap siunnersuummik suliaqarnermini pineqaatissiisarnerup qaffasinnerpaaffissaanut killissarititap pisuni immikkut ittuni taamaallaat atuutilersinneqarnissaa oqaluuserineqarpoq.

Taamaattoqassaguni suliat soorlu toqutsinerit ingasattumillu kinguaassiuutitigut pinerluuteqarnerit ilaatinnagit - ukiut qulit suli tunngavigineqassapput.

Ataatsimiititalialli inatsit nutaaq pinerluuteqarnernut ataasiakkaanut immikkut killissarititalersuissanngitsoq aalajangerpaa.

- Tamatumani nalilerneqarpoq tamatuma pinerluttulerinermi inatsimmi pineqaatisseeriaaseq pisariaqanngitsumik pisariunerulersissagaa, tamatumalu saniatigut pineqaatissiinermut killiliussanik ilaannakortumik atuutsitsilernertut aamma paasineqarsinnaassalluni, ataatsimiititaliaq allappoq.

Naalakkersuisulli pinerluuteqartarnermi killissarititanik immikkut ittumik atuutsitsilernissamik kissaateqarnertik eqqartuussiveqarnerup aaqqissuuteqqinnissaanut suliniuteqaqqinnerminni suliarinneqqullugit ataatsimiititaliamit kaammattuuteqarfigineqarput.

Eqqartuussiveqarneq nunatsinnit suli akisussaaffigineqannginnera pissutiglaugu inatsit nutaaq Folketingimi akuersissutigineqaqqaarluni nunatsinni atuutilersinnaavoq.