Nuummi angajoqqaat meeqqerivimmiittuutillit akerliussutsimik takutitsiniartut

Evannguaq Olsen Cortzen Nuummi Meeqqerivik Nukariinniittuuteqarpoq. Taanna meeqqerivimmi perorsaasunik, isumaginninnikkullu sulisunik, amigaateqarneq pillugu angajoqqaat sinniisaat suleqatigalugit, akerliussutsimik takutitsinissamik aaqqissuussipput. Atorfiit affaat inuttaqanngitsut , taanna oqaluttuarpoq.

- Sulisoqarnikkut inissisimaneq unamminartorujussuuvoq. Atorfinni 29-usussani atorfiit 15-16-t inuttaqannginneri, pisortaqannginneralu unamminartumi inissisimapput, Evannguaq Olsen Cortzen meeqqerivimmiittuutilik oqarpoq. 

Angajoqqaat ilinniarsimasunik perorsaasoqannginnera meeqqat ineriartornerannut eqquinerlunnissaa ernumagaat.

Perorsaasunimmi amigaateqarneq meeqqat ineriartornerannut eqquinerlussinnaasoq taakku isumaqarput:

- Meeqqat ineriartornerannut perorsaasut sunniuteqaqataasartorujussuupput, perorsaasut ilisimasaat pingaarutilerujussuugamik meeqqanut ineriartortitsinermi, aammalu sammisaqartitsinerni assigiinngitsuni eqqumaffiginninnerit assigiinngitsut pisarmata ilisimasaat pingaarutilerujussuupput, taanna oqarpoq.

Perorsaasoq: Aningaasarsiakippalaartpugut

Ullumikkullu perorsaasunut atugassarititaasut naammaginanngilluinnartut perorsaasutut Via University College-mi ilinniarsimasoq Helene Lennert Fleischer isumaqarpoq, taanna assigiinngitsunik peqquteqarluni meeqqerivimmi sulinnginnini tunngavilersorpaa:

- Ullumikkut atugassarititaasut pikkunakullattutut oqaatigerusunnarput, meeqqerivinni sulinermi atukkat, akisussaaffiit annertussusii taavalu aningaasat tiguneqartartut naapertuutinnginneri, taamatut sivisutigisumik, taamallu imartutigisumik ilinniarnikuulluni uterluni meeqqerivimmut aningaasarsiat nikingaartannginneri tupannartorujussuuvoq. Helene Lennert Fleischer taama oqarpoq. 

Taanna  ilinniareerluni uterami aningaasarsiat tungaatigut assigiinnginnerujussuaq ingerlaannaq maluginiarpaa, nammineq perorsaasuusutut ilinniarsimasuulluni, perorsaasumik Danmarkimi sulisumik qanigisaqarnermigut aningaasarsiat assigiinnginnerujussui tupaallaatigerujussuarnikuuaat. 

Helene Lennert Fleischer-mi taamanikkut meeqqerivimmi pisortat tullersortaattut atorfeqarpoq. Ajaaraalu Danmarkimi perorsaasutut atorfilik aningaasat 6-7000 koruunit tungaanut annertutigisunik akissarsiakkaanerusimavoq.

- Perorsaasumik ajaaraqarama Danmarkimi oqaloqatigiilluta tupannikooqaagut aningaasarsiatta qanoq nikingatiginerinik, uanga taamani Meeqqerivimmi pisortat tullersortaatut sulillunga, ajaarara Danmarkimi perorsaasutut sulisoq, uanga aningaasarsiakka 6-7000-nik ikinnerupput. Taanna taama oqarpoq. 

Perorsaasullu kiisami tusaaneqarnissaat Helene Lennert Fleicher-p kissaataata annersaraat:

- Taamaattumik naligiisinneqalernissarput uagut aamma iliuuseqarfigineqarnissaa kissaatima annerpaartarivaa, taavalu kattuffitta perorsaasutut ilinniarsimasut ilaasortani suli sakkortunerusumik, suli nukittunerusumik tapersuinissaa kissaatigaara, taanna oqarpoq.

Akerliussutsimik takutitsinissaq aqagu Nuummi nalunaaqutaq marlunut Amisuniit aallartissaaq. Aaqqissuisut akerliussutsimik nuna tamakkerlugu takutitsisoqarnissaanik kaammattuuteqarput.